Seint torsdag kveld fekk ein arbeidsbåt motortrøbbel utanfor Orre.
To personar blei redda av Hovedredningssentralen (HRS). Ingen blei skada.
Båten, som derimot ikkje blei berga på tidspunktet, blei liggande på rek gjennom natta på grunn av høge bølger og sterk vind. Slik enda den opp litt lengre nord, på Borestranda.
– Kystverket var redde for at båten skulle fare ut igjen. Me fekk derfor beskjed om at båten måtte fjernast i løpet av dagen, seier bergingsleiar Lars Lønning i Norsk Berging.
2,5 kilometer mellom to maskinar
Jærstrendene er verna område. Før arbeidet kunne setjast i gang, måtte det derfor søkast om dispensasjon til motorferdsel hos Statsforvaltaren.
– Då me fekk godkjenninga fredag ettermiddag, hadde me allereie mobilisert på plass ein maskin som stod klar lengre oppe. Same dag fekk me altså dratt båten tjue meter inn på land, slik at den låg trygt gjennom helga, forklarer Lønning.
Måndag gjekk bergingsselskapet til verks med ein gravemaskin til, og utstyr til å løfte med.
– Me løfta båten mellom to gravemaskinar og bar den med oss oppover. Den blei altså belta 2,5 kilometer mellom to maskinar, seier bergingsleiaren, og held fram:
– For å unngå å lage så mykje spor og merker i sanddynene, køyrde me heilt nord til elva, i ytterkant av sanddynene.
Tyngre enn antatt
Alt gjekk som planlagt, ifølgje Lønning.
– Men det er klart at det var ein del planlegging knytt til korleis båten skulle stroppast, og ikkje minst kva kapasitet me trengde for å klare å løfte den. Båten var dobbelt så tung som me hadde fått beskjed om, så me måtte inn med ganske store maskinar, seier han.
Ein spesiallastebil kom så og henta den fire meter breie og over ti meter lange båten, før den blei køyrd til Norsk Berging sitt lager på Bømlo.
– Der blei det gjort ein sjekk av båten, som no er levert tilbake til eigarane.
– Korleis er tilstanden på båten?
– Det blir vel gjort nokre vurderingar på det no, men sannsynlegvis blir nok båten sett i drift igjen.