Målet var å bygga leilegheiter og næring i Hetlandsgata, men sidan det kunne dra ut tid, stilte kommunen krav om annan bruk dersom utbyggaren ikkje kom i gang.
Saman med løyvet til å riva to einebustader, fekk Jærbo AS ein frist til å starta byggearbeida. Dersom ikkje den vart følgt, skulle tomta «opparbeidast/nyttast til park/grøntområde».
Heimelen finst i sentrumsplanen for Bryne, målet er å unngå at tomter blir liggande som gapande hòl i bybildet.
Fristen til Jærbo AS gjekk ut 1. juli 2018, men vart sidan forlenga fleire gonger. Saka vart både lang og uoversiktleg, men enda med eit endeleg krav om opparbeiding – innan 1. september 2023.
Rulla ut Aarbakkebanen
Dagen før fristen gjekk ut, opparbeidde Jærbo AS tomta med å gjenbruka den gamle treningsbanen til Bryne FK.
I førevegen hadde byggesakssjefen i Time meldt frå at vilkåret i rivingsløyvet, etter administrasjonen sitt syn, føreset at «gresset er naturlig og ikke kunstgress/plastikk».
Jærbo AS meinte løysinga med kunstgras var både brukbar og berekraftig. Fokuset deira var å realisera leilegheitsprosjektet, parken var eit mellombels tiltak fram til byggestart.
Vart akseptert
I februar 2024 vedtok fleirtalet i utval for lokal utvikling – under tvil – at løysinga kunne aksepterast. Utbyggaren slapp ei millionbot, men kom ikkje unna skuldingar om grønvasking og dårleg utført arbeid.
Utfallet var i tråd med innstillinga frå kommunedirektøren, som tok sjølvkritikk i saksframlegget:
«Manglende spesifisering av vilkåret i tillatelsen er til å ta lærdom av. I fremtidige tillatelser bør det gå tydeligere frem hva som konkret forventes. Konklusjonen er at begge utfall kan forsvares, men at tvilen bør komme utbyggerne til gode og at ulovligheten avsluttes.»
_1.jpg)
Fekk klarsignal i januar 2024
Dagen før politikarane aksepterte den mellombelse parkløysinga, gav kommunen rammeløyve til Jærbo AS.
Løyvet til å bygga fire etasjar med 17 leilegheiter og eitt forretningslokale, gjeld i tre år frå 30. januar 2024.
21. april godkjende styret i Jærbo AS rekneskapen for 2025. I ein note kommenterer det status og føresetnadene for vidare drift:
«Styrets arbeid i 2025 har i hovedsak bestått av å sikre en godkjent reguleringsplan for eiendommen som en besitter. Prosessen med kommunen har gått veldig sakte, men det ble i juni 2023 endelig vedtatt reguleringsplan for utbygging av boliger.»
Verdifulle tomter
Jærbo AS vart etablert i 2012 med sikte på å legga til rette for ei aktiv stadsutvikling, gjennom å kjøpa, eiga og forvalta eigedommar i Time kommune.
Naboeigedommane i Hetlandsgata vart kjøpte i 2012 og 2013. I noten til rekneskapen skriv styret at verdien på dei ferdig regulerte tomtene er langt større enn summen av innskoten kapital og lån som er tatt opp i selskapet.
Ved utgangen av 2025 hadde selskapet ein negativ eigenkapital og ei samla gjeld på 9,86 millionar kroner. Den største delen er langsiktig gjeld til kredittinstitusjonar. Jæren Sparebank har pant i eigedommane.
Selskapet har udekte tap på 3,3 millionar kroner, viser rekneskapen, og tok opp ytterlegare ein halv million i lån i 2025.
Forsøker å selja
Ifølge noten arbeider styret «nå med å prøve å selge prospektet og/eller selskapet».
Rammeløyvet som gjev selskapet rett til å bygga, går ut i januar neste år – det kan også vera ei moglegheit.
– Me vurderer begge delar, og har lagt inn ei opning for å selja. Det er det eg kan seia i dag, seier Arild Magne Lunde.
Styreleiaren fortel at det kan skje ting dei neste vekene som gjer at kan gje meir utfylland svar.
Han fortel også at dei ikkje har fått tilbakemeldingar på den mellombelse parken i Hetlandsgata.
