Reint værmessig er det ein nasjonaldag av det heilt sjeldne slaget. I skulegarden til Høyland skule er det fullt av folk som kosar seg ute i sola. Slik tradisjonen er, får sjuandeklassingar som skal forlata skulen, utdelt sølvskeier. Foreldra tar bilde.
Så får konferansier Bjørn Ståle Bekkeheien barna til å synga Høyland-songen, før leikane kan starta.
Den første leken er enklast. Det er eit løp, spring fram og tilbake over marka før du hentar ein liten premie. Ungane vert sendt av garde trinn for trinn, enkelte med høgare intensitet enn andre.
Seinare følger det andre leikar, som fiskedam, kast på blikkboksar, stylteløp, sekkeløp og så bortetter.
Alfred Balder Gustavson Høyland (10) og Margit «Grevling» Nærland slår kvarandre med kva sin sekk for å sjå kven som først fell av tømmerstokken dei sit på.
– 17. mai er veldig gildt. Eg skal ete mykje is, seier Nærland.
Dei fleste sit ute i finvêret, men serveringa går føre seg inne i den pynta gymsalen. Eric Perroud er med og sel kaker, brus og kaffi på dugnad. Mange foreldre har bakt flotte kaker, og etterspurnaden er stor.
– Det var roleg litt tidlegare på dagen, men nå har det vorte travelt, seier Perroud.
Han er imponert over kakene foreldra har levert til utsalet.
– Du skulle tru det var konditorar som hadde laga dei. Standarden er vanvitig høg, seier han.
Ute sit Arnt Egil Nærland, Gunn Nærland og Helga Høyland og nyt sola. Dei tre seier til Jærbladet at det ikkje ofte dei har sett like mange vera med på 17. mai-feiringa som i år.
Alle tre har barnebarn som går på skulen.
– Dette var ein sjeldan bra dag, seier Arnt Egil Nærland.
Han burde vita kva han snakkar om. Han har sjølv vore elev ved Høyland skule, og seier han har vore med på minst 60 nasjonaldagsfeiringar her.
– Det er eit kjempeframmøte av folk. Det er nok det gode vêret som gjer det, seier han.
– Det er heilt fantastisk. Det er lenge sidan sist det var så fint vêr på 17. mai, seier Helga Høyland.