Det frekke tjuveriet fredag skjedde tidleg på ettermiddagen, rett før slutten av skuledagen.
Nokre elevar inne i eit klasserom oppdaga kva som var i ferd med å skje, og ein lærar sprang ut.
Dermed stakk sykkeltjuvane av – den eine på ein stolen elsykkel, den andre på ein stolen elsparkesykkel.
– Det såg ut som om dei hadde tenkt å ta med seg fleire syklar, for det var fleire låsar som var klipte. Men det er berre den eine elsykkelen og den eine elsparkesykkelen som er borte, fortel rektor Iselin Gjære Lothe ved Bryne ungdomsskule.
Ho har kontakta politiet og gitt vidare eit signalement av dei to sykkeltjuvane – ein mann og ei kvinne.
– Føresette til dei som har fått stole syklane, har fått beskjed direkte, og dei har sagt at dei skal melda tjuveria til politiet. Eg har også sendt ut melding med informasjon til alle foreldra om det som har skjedd, seier rektor når Jærbladet ringjer etter at me fekk høyra kva som hadde skjedd.
– Dette er ei god påminning om at det er viktig å ha lås på sykkelen og å bruka han. Sjølv om tjuvane kan klippa av låsen, så er det i det minste litt vanskelegare å stela ein sykkel som er låst, legg rektoren til.
– Og så kan det vera lurt å ha ein solid lås?
– Ja, det kan det jo.
– Er elevane flinke til å låsa syklane sine?
– Ja, generelt er dei det. Men det vil alltid vera nokon som ikkje brukar låsen kvar gong dei parkerer sykkelen, seier rektor.
– Har du opplevd liknande før?
– Ja, det må eg vel kunna seia. Eg har sjølv blitt fråstolen sykkelen min medan han stod parkert utføre skulen, fortel Iselin Gjære Lothe.
Det er ein tre års tid sidan, og også då hadde var låsen klipt av.
Skulen har også for ikkje så lenge sidan opplevd at det blei stole blomar frå blomsterpottene utføre, men rektor slår fast at det heldigvis ikkje er så ofte at det skjer tjuveri frå skulen sitt område.