Sidan starten av koronapandemien i mars i fjor har det vore ein strikkeboom i Noreg, det merka dei godt til hjå Strikkemekka som held til på Orstad. Denne veka opna dei nytt robotlager, kanskje som første garndistributør i verda.
– Me har hatt ein ekstremt stor vekst. Det er ein av grunnane til at me har investert i det nye robotlageret, fortel eigar og dagleg leiar Eirik Fuglestad.
I det nye lageret har Strikkemekka nytta 700 boksar som inneheld varer som garn og strikkepinnar. Totalt inneheld heile lageret 1.5 million garnnøste, og framleis har dei ikkje teke i bruk heile lageret.
Meir effektivt
Den store veksten har gjort at dei tilsette ved lageret på Orstad har mykje å gjera.
– Dette er ei investering i våre tilsette. Det å jobba på lager er ofte tungt arbeid, og ein kan få belastningsskadar og liknande. No treng dei ikkje lenger klatra opp i reolane for å henta varene og får litt andre oppgåver, seier Fuglestad.
Det nye lageret vart opna denne veka, og det har Fuglestad kan fortelja at dei tilsette er veldig tilfreds med dei nye oppgåvene.
– Nokon vil gjerne tenka at me vil seie opp tilsette no som prosessane blir effektiviserte, men det gjer me ikkje. Den siste tida har me vekse så mykje at me har bruk for alle dei tilsette me har for å få unnagjort behandlinga av bestillingane, seier Fuglestad.
På sikt vil pakkinga av varer gå endå raskare enn det gjer no.
– Det tar litt tid å setja seg inn i dei nye rutinane, men innan kort tid har me planar om å korta ned behandlingstida av bestillingane. Før har det gjerne tatt ein til to dagar, men no er målet at det ikkje skal gå meir enn fem timar.
Behandlingstida er tida det tar frå behandlinga er registrert i nettbutikken til varene er sendt frå lageret.
Store planar
Det nye lageret er ikkje berre ei investering i dei tilsette, det er også ei investering i framtida. Etter den store veksten har nemleg eigaren planar om å nå lenger enn landets grenser.
– Me er store i Noreg no, men på sikt har me planar om å sende varer verda rundt. Det er ingen problem å levere varer til England dagen etter bestillinga er gjennomført, seier Fuglestad.
Det er derimot ikkje berre garn og strikketilbehøyr som blir selde i nettbutikken, det gjer og 5000 ulike strikkepakkar med oppskrifter.
– Det er ein komplisert prosess. For å nå til England må me ha oppskrifter på engelsk, i Italia oppskrifter på italiensk, då må dei omsetjast, seier han.