Dersom haustens kommuneval- og fylkesval gjekk vegen, hadde Andreas Vollsund planen klar: Han skulle ringa partikollegaen Ole Ueland, som i dette scenarioet var blitt ny fylkesordførar i Rogaland, og be om å få overta grusbanen ved Brynehallen.
– Grusbanen står ubrukt til alle døgnets tider. Han blir aldri brukt, midt i indrefileten av byen. Det har irritert meg.
Kjapt levert
Time kommune har overtatt bygningane etter Bryne vgs., men fylkeskommunen eig framleis Brynehallen og den over fire mål store grusbanen, som ligg nedanfor.
Vollsund seier at kommunen har prøvd å få hand om banen tidlegare, men at det av ukjende grunnar ikkje er lukkast. Etter valet ville han prøva på ny, og han fekk raskt positiv tilbakemelding.
– Heile poenget er at nå skal me legga kunstgras her. Det må kommunestyret finna pengane til i økonomiplanen. Men banen ligg her, er planert, og er klar til å gjerast om til ein kunstgrasbane. Eg trur ikkje det blir den store kostnaden.
Forståinga med fylkeskommunen vart presentert for formannskapet på tysdag, og møtte tverrpolitisk støtte der.
To vilkår
Eigedomsavdelinga i fylket ser ingen grunn til å tvihalda på banen, som fylkeskommunen gjev slepp på vederlagsfritt.
Heller ikkje i fylket blir det politisk behandling. Time kommune må berre gå med på to vilkår:
- Bryne vgs. skal få nytta banen etter behov.
- Fylkeskommunen skal ha han tilbake, dersom kommunen skulle finna ut at tomta skal brukast til andre føremål.
– Eg ser at det er ei hensiktsmessig plassering her, i forhold til annan offentleg infrastruktur. Slik eg har forstått det, er det fotballbane det skal vera her framover, seier Ueland om avtalen.
Time-ordføraren kallar han eit «dobbelt kinderegg».
Når Bryne vgs. ikkje nyttar banen, står barneskulen og ungdomsskulen klar. Dermed vil han bli fullt utnytta på dagtid.
Ikkje minst vil han avhjelpa kapasitetsutfordringane på kveldstid, til Bryne FK og Rosseland BK, og til uorganisert idrett.
Aukar kapasiteten
Grusbanen ved Brynehallen er 45 meter brei og 90 meter lang, viser ei oppmåling med verktøy frå Kartverket. Her er det minimum plass til ein stor 9-bane.
Slike eigedommar er det ikkje flust av på Bryne. Den langsiktige jordverngrensa gjer at ein ny bane ikkje kan leggast utanfor byen.
Banekapasiteten er dårlegare enn på Frøyland, Lye, Hognestad og Undheim. Fotballklubbane må ut av kommunen for å finna ledige flater, og kapasiteten avgrensar kor lenge dei kan gje ungdommane eit treningstilbod.
– Me har levert godt i heile kommunen, men har mangla kapasitet på Bryne, og nå fullfører me her. Med den doble hallen som opnar på fredag, har me bygt tre idrettshallar, éin turnhall og to 9-arbanar, seier Vollsund.
Den andre 9-arbanen er også ein grusbane – enn så lenge. Banen ved Rosseland skule skal få kunstgras når vêret tillèt det.
Samarbeid med fylket
Fredag 9. februar er det opning av Bryne storhall – ein dobbel fleirbrukshall som for snart to år sidan hang i ein tynn tråd.
Etter ein prissmell på 50 millionar, rådde kommunedirektøren politikarane til å avlysa anbodskonkurransen og utsetta bygginga.
Han fekk ikkje til å rekna heim kostnadsauken, før den største brukaren, Rogaland fylkeskommune, vedtok å auka den årlege leiga.
Fylkesordføraren peikar på Bryne storhall og grusbanen som eksempel på godt samarbeid.
– Det som er sikkert, er at me skal finna gode samarbeidsavtalar på ting kommunane er opptatte av å få løyst. Ved å legga godviljen til frå alle sider, er det mogleg å få til meir enn det ein greier å få til kvar for oss.