Det kjendest nesten ut som om naturen diska opp med sin eigen jærske slam-poesi – med stor intensitet og utilslørt fysisk nærvær – då diktarstien i Hå vart gjenopna torsdag ettermiddag.
Ein kraftig vind frå nordvest røska i dei besøkjande oppe på toppen heilt ute ved havet. Kaldt, ja – men sola hadde skine så godt som heile dagen.
Men så – nett før den høgtideleg opninga skulle starta – kom det ei skikkeleg bøye med vassrett regn.
– Det ser ut som om det gjev seg snart, trøysta songar og musikar Jarle Obrestad, som hadde med seg elgitaren for å opptre med to av sine eigne songar – begge med tekst av Helge Torvund.
Og det gjorde det, i løpet av ordførar Andreas Bjorland sin tale, der han skrytte av kor fint det har vorte etter oppgraderinga av stien, gjerda, portane og steinane med dikt som ligg langs stien, som går frå vegen og bratt opp til toppen rett oppføre Obrestad hamn.
– Den tøffaste opptredenen nokon gong
Jarle Obrestad var spent på om kan kom til å få lyd i elgitaren etter det kraftige regnvêret.
Det gjorde han heldigvis.
Men den kalde nordvesten heldt fram med uforminska styrke, så det blei kaldt på fingrane å spela gitar. Såpass kaldt at han lurte på om han skulle gje seg etter ein song. Men når han kjende etter, var der litt kjensle att i fingrane enno, så han tok den andre også.
– Det er den tøffaste opptredenen eg har natt nokon gong, fortalde han til Jærbladet etterpå.
Det er Nærbø Bygdeservice som har teke seg av den praktiske jobben med oppgraderinga av diktarstien opp til staden som Hå i 1999 valde til kommunen sin tusenårsstad – og som vart høgtideleg opna året etter.
No, eit kvart århundre seinare, var det heile prega av vêr og vind, og hadde behov for ei skikkeleg oppgradering. Hå historielag og Hå kommune har samarbeidd tett om organiseringa av prosjektet, og pengane kjem i hovudsak frå to bankstiftingar.
Torsdag ettermiddag og kveld var det altså høgtideleg nyopning av diktarstien, før turen gjekk vidare til Hå gamle prestegard, der elevar frå Hå kulturskule, Helge Torvund, Nina Ellen Ødegård, Jarle Obrestad, Torstein Obrestad, Gunnar Tønnesen, strykekvartett frå Jæren Symfoniorkester, Tom Hetland og Svein Høyland stod på scenen.
Arrangementet var eit samarbeid mellom Hå kommune, Hå historielag, Hå mållag, Hå gamle prestegard, Hå kulturskule, Hå bibliotek, Garborgsenteret og Klepp kommune.
– Eg er verkeleg glad for dette
Poeten Helge Torvund fortel at han ikkje har fått sett korleis det ser ut på den nyoppussa diktarstien.
– Eg er ikkje så god til beins lenger, men eg har sett fotografi av korleis steinane med dikt no ser ut. Teksten kjem skikkeleg fram, men samstundes ser du at teksten begynner å gro saman med steinane. Det likar eg godt, seier Torvund til Jærbladet.
Han var sjølv med på å plukka ut dei sju tekstane som er å sjå langs diktarstien.
– Så for meg er dette personleg. Eg er verkeleg glad, både for at dei har sett i stand diktarstien att og for at dei har denne store markeringa av dagen her på Hå gamle prestegard, seier Torvund.
Diktarane som er representerte langs stien, er Åse-Marie Nesse, Tobias Skretting, Alfred Hauge, Arne Garborg, Alexander Kielland, Helge Torvund og Tor Obrestad.
