Folk – særleg småbarnsfamiliar – strøymde til Jerseymeieriet på Herikstad laurdag formiddag. Då var det kuslepp, for tredje året på rad. Ein folkefest med sal av lappar, pølser og meir – og med slepp av kyrne på beite som det store høgdepunktet.
– Det var litt tilfeldig at me begynte med dette. Me ville laga eit arrangement for å visa folk at me er her, og for at folk kunne få koma og sjå eit kuslepp. Det er jo ikkje alle som har dagleg kontakt med kyr, og då er det jo litt spennande, seier dagleg leiar Sonja Herikstad Skårland ved Jerseymeieriet.
Dei hadde ikkje tenkt at det skulle bli ei årleg hending, eigentleg, men i fjor begynte folk å spørja når kusleppet skulle vera – og dermed valte Jerseymeieriet å gjera det til ein tradisjon.
Dermed kunne folk også i år koma og sjå at dei små, brune kyrne – som gjev ei ekstra feitt- og proteinrik mjølk – blei sleppte på beite for sommaren.
Eller eigentleg ikkje heilt.
– Det har vore kaldt, våren er sein, så det er ikkje klart for beite der kyrne skal gå. Så i dag får me sleppa dei ut så dei får kosa seg litt, og folk få sjå litt på dei. Men så må kyrne inn att og vera der ei stund til – til det er nok mat til dei på beitet, seier Sonja Herikstad Skårland.
Det er mykje å gjera rundt eit slikt arrangement. Sjølv står den daglege leiaren og lagar meir lapperøre då Jærbladet snakkar med henne. Ektemannen Per Ådne Skårland – som har hovudansvaret for gardsdrifta – er i fjoset for å gjera kyrne klare til slepp.
Men det er arbeidsoppgåver for heile storfamilien, og dei er verkeleg sette i sving: som trafikkdirigentar, lappesteikarar, kupassarar og mykje meir.
Faster Bergfrid Herikstad er eit stort smil der ho står med takkene og steiker lappar – saman med venninna Astrid Håvarstein.
– Det er veldig gildt å vera med på dette, slår Herikstad fast.
Og kyrne? Jo, dei hoppa og dansa litt, som kyr skal når dei får den første dagen på beite etter mange månader inne i lausdriftsfjoset. No hadde dei vore inne sidan slutten av september.
