2025 blir året kleppsbuen får det etterlengta tilbodet tilbake – i alle fall for ein periode.
Politikarane har nemleg bestemt at den nye aktivitetsparken i Klepp får midlertidig isflate i slutten av året.
– Aktivitetsparken har det alltid vore tenkt is på. Me føler oss nok forplikta i kommunikasjonen ut til våre innbyggjarar, om at me vil ha is så snart parken er klar, sa Fridtjov Helland (H).
Kommunedirektør Torild Lende Fjermestad meinte plenen, der banen kan setjast opp, trong ein sesong ekstra for å gro. Ho ville vente med isflata til november 2026.
– Eg er son til ein gartnar, og eg meiner det er forsvarleg å legge is på den i år, sa Helland.
– Stor verdi for skular og barnehagar
Aktivitetsparken i Klepp sentrum, døypt Plogenparken, opnar førstkomande laurdag.
Kommunen hadde først ambisjonar om å bygge parken med isbane, for å halde ved like tilbodet som fanst ved Jærhagen mellom 2005 og 2018.
No skal dei i staden bruke midlar frå eit fond på 1,5 millionar kroner for å realisere banen periodevis. I første omgang er det berre pengar til éin sesong.
I saksdokumenta anslår kommunedirektøren at ei flate i seks veker vil koste omtrent 955.000 kroner. Per veke er det 17 til 20.000 kroner i driftsutgifter.
– Då det blei etablert skøytebane i Klepp, hadde det stor verdi for skular og barnehagar, som kunne lære å gå på skøyter. Den halvanna millionen er verdt kvar ei krone, synest eg, sa Tom Ove Øksnevad (Frp) under møtet.
– Eg er gartnar sjølv. Eg trur graset blir øydelagt uansett, midt på vinteren, og det er ikkje verre enn å trille nytt gras, sa Ove Horpestad (H).
Ragnhild Rørstad var den einaste som stemte imot isflate i det heile, og ønskte å bruke pengane på eit meir varig tiltak for barn og unge.