Måndag ettermiddag la kommunedirektøren fram sitt forslag til budsjett for neste år, økonomiplan for dei neste fire åra og investeringane for dei neste ti åra.
Det mest spektakulære forslaget er ein ny, felles, stor sjukeheim for heile Klepp – til erstatning for dei to sjukeheimane som kommunen har i dag: Kleppheimen og Sirkelen.
Kommunedirektøren har lagt inn tett på ein milliard kroner til prosjektet i åra 2033 til 2035.
– Må prioritera lovpålagde oppgåver
Meir om sjukeheimsplanane seinare, men først litt om økonomien generelt.
Klepp kommune får stadig fleire eldre innbyggjarar og fødselstala veks raskare enn venta. Dermed reknar Klepp kommune med å måtta bruka endå meir pengar enn dei har rekna med på tenester til innbyggjarane i åra som kjem.
Samstundes kjem nedbetalingane på dei store låna som er tekne opp i det siste, mellom anna til skulebygg og til rådhus, kulturhus og kyrkje-prosjektet i sentrum.
Dermed blir det kommunedirektør Torild Lende Fjermestad sin jobb å halda igjen på utgiftene og å gjera tøffe prioriteringar.
– Me må prioritera lovpålagde oppgåver strengare og redusera tilbod på andre område, slår Fjermestad fast.
– Forventningane må justerast
Klepp har blant dei lågaste inntektene per innbyggjar i heile landet, samstundes som rekneskapstala viser at dei også er blant kommunane som driv tenestene billegast.
Det er kommunedirektør Fjermestad stolt over, og ho skryt av dei tilsette.
– I Klepp kommune har me mange flinke medarbeidarar og leiarar. Eg er stolt over arbeidet dei tilsette i Klepp kommune gjer for innbyggarane. Det gjer at me oppnår mange gode resultat, seier ho til Jærbladet.
Ho trekkjer fram at Klepp det siste året har blitt kåra til årets pårørandekommune, nest best styrte kommune i landet, har landets beste handlings- og økonomiplan og er kåra til landets mest bustadvennlege kommune.
Samstundes legg kommunedirektøren ikkje skjul på at det kostar å ha låge inntekter på innbyggjar, og at dei som jobbar i kommunen opplever handlingsrommet som svært knapt.
Kommunedirektøren skriv det rett ut i forslaget til økonomiplan:
– Det er stadig behov for omstillingar, små knepp og større grep i tenestene for å kunna levera tenester med dei økonomiske rammene me har. Det krev mykje av leiarar og medarbeidarar. Me vil måtta ta i bruk meir teknologi og realisera gevinstane ved dette, heiter det i forslaget til handlings- og økonomiplan for 2027–2030.
– Framover vil det krevja mykje av innbyggjarar og politikarar å stå i det at me må endra måten me leverer tenester på. Forventningane må justerast, me vil verken ha nok folk eller pengar til å levera tenester på same måte som før, heiter det vidare.
Klepp kommune har 2,25 milliardar kroner i totale inntekter i 2027, og reknar med å brukar rett over 2,2 millionar kroner på drifta. Då skal dei sitja att med eit driftsresultat på 2,9 prosent av driftsinntektene, som er litt over det langsiktige målet for overskot, som skal sikra at kommunen er rusta til å gjera nye investeringar og ta uventa kostnader.
– Me slepp å kutta, og det er jo godt nytt. Men samstundes kan me ikkje slappa. Me er nøydde til å halda stram økonomistyring framover for å halda på kontrollen, seier Fjermestad til Jærbladet.
Ny, stor sjukeheim?
Ein ny stor sjukeheim kan altså stå klar i 2035, men framleis er det mykje arbeid som står att.
– Så langt har me klart å skaffa tilsette til eldreomsorga, men det er signalisert ein stor mangel på folk til å fylla stillingane, så me er nøydde til å tenkja nytt, seier Fjermestad til Jærbladet.
Klepp kommune har sett på mogelegheitene for å byggja to nye fløyer på Kleppheimen, og i tillegg oppgradera dagens bygningar.
– Det viste seg at det blir færre plassar i eksisterande bygg på grunn av nye reglar, og dessutan at det er vanskeleg å få knytt på nye fløyer på ein god måte, slik at det framstår som eitt bygg. Drifta vil då måtte planleggjast som om det var tre ulike bygg. Då får me ikkje teke ut stordriftsfordelar, forklarar Fjermestad til Jærbladet.
For å maksimera stordriftsfordelar, har ho derfor no sett i gang arbeid med å sjå på ein stor, felles sjukeheim for heile kommunen, med opptil 130 plassar.
– Med ein ny stor sjukeheim kand et bli enklare å gje gode og trygge tenester med færre tilsette, seier Lende Fjermestad.
Kor den nye sjukeheimen skal liggja, og kva som skal skje med dei to andre bygga, er blant spørsmåla administrasjonen no må finna ut av, i tett samarbeid med politikarane.
Sal av eigedom kan vera eitt alternativ, annan bruk eit anna.
– Sirkelen kan blant anna eigna seg godt til omsorgsbustader, seier Fjermestad.
Klepp kommune har den siste tida gjort liknande grep i andre sektorar, mellom anna ved å leggja ned små barnehagar og små skular og satsa på større einingar.
– Det har gitt lågare driftskostnader per barn, slår Fjermestad fast.
Rådhus, kulturhus og kyrkje er klart
– Er det noko du har hatt sjukt lyst på, som du ikkje har funne rom til i denne økonomiplanen?
– Veit du kva eg har hatt sjukt lyst på? Dette!, seier Fjermestad, og peikar rundt i foajeen på det nye kulturhuset, der Jærbladet treff henne og økonomisjefen rett før presentasjonen av økonomiplanen måndag ettermiddag.
– Så eg har allereie fått det aller største ønsket mitt oppfylt. Her har me fått fantastisk flotte nye lokale, både rådhuset, kulturhuset og kyrkja. Og det har me fått utan at det har dukka opp nokre overraskingar i byggjeperioden. Og me kjem i mål til ein lågare pris enn budsjettert. Så eg er nøgd, seier Fjermestad.
Prisen har vore oppjustert nokre gonger sidan dei første kalkylane, men no ligg det an til å bli 56 millionar krone billigare enn budsjettert.
Den offisielle opninga av kulturhuset skjer for øvrig 21. november.
Framskundar Markå barnehage
Innbyggjarane i Klepp kommune får og fleire barn i åra som kjem.
Den auka veksten gjer at kommunedirektøren framskundar byggetrinn to av Markå barnehage på Kleppe, som no skal stå ferdig til 2030.
Kommunen har brukt mykje pengar på skular dei siste åra.
No står oppgradering av Orstad skule (187 millionar kroner) og oppgradering av delar av Kleppe skule (95 millionar kroner) for tur.
Også ny legevakt (33 millionar), ny brannstasjon (157 millionar) og nytt hjelpemiddellager (44,5 millionar) på Tu er blant tinga som står på investeringsplanen.
Klepp gjer også tunge investeringar i vatn og avløp på totalt 212 millionar kroner dei neste fire åra. Nesten 100 millionar av dette skal investerast allereie til neste år.
På kyrkjebudsjettet er det lagt inn pengar til gravplass på Orstad dei neste to åra. Løyvinga er reudsert med 8,4 millionar kroner, til 17 millionar, rett og slett fordi kommunen trur det blir billegare å opparbeida gravplassen slik marknaden no ser ut.
Men kommunen held ein del att på investeringane, for at gjeldsbyrda ikkje skal veksa seg for stor, og for at dei skal kunna betala renter og avdrag.
Mange investeringar er vidareførte frå tidlegare planar. Dei to neste åra blir investeringane på rundt 350 millionar kroner årleg, deretter går dei ned.
I den komande fireårsperioden er det også lagt inn heilt nye investeringar for totalt 55 millionar kroner: