Sist ho såg leilegheita, ein gong i april, var det berre betong her. Nå nærmar det seg innflytting, og meklaren byr på ein snikkikk.
Alle gipsveggene er måla, og på golvet er det eikeparkett, slik at besøkande må ta av seg på beina.
Utan tilgang til leilegheita har Lindis finstudert planteikninga, målt med linjal og kryssa fingrane for alt vil passa.
– Kan tru eg har shoppa mykje, ler ho.
Framfor alt gjeld det sofaen, som skal stå mellom kjøkkenet og endeveggen med store vindauge.
Men før ho rekk å finna fram lasarmålaren og kontrollmåla, må ho ta innover seg lyset som flaumar inn i leilegheita.
– Den utsikta. Wow! seier ho.
Går i pluss
Lindis flyttar frå eit rekkjehus på Rosseland. Ho er glad i plassen, nær barneskulen, og har vore i tvil om at det er rett å flytta.
Men nå begynner sonen å bli eldre, og ho er mektig lei av å beisa terrasse og klippa hekk. Ho ser berre fordelar med å flytta i leilegheit.
– Veit du kva eg er så glad for? Eg har verdas finaste plen – og eg slepp å klippa han!
Ho kjøpte for ein fast pris i september i fjor og fekk nyleg selt for ein god pris. Sjølv etter tilval og kjøp av nye møblar går ho i pluss.
– Rekkjehuset mitt vart kuppa. Då dei gav 350.000 over prisantyding, våga eg ikkje å seia nei.
Gamingrom til sonen
Lindis kikka først på leilegheitene i andre etasje, som er hakket mindre, men som har privat tribune med utsikt mot hovudbanen.
I tredje etasje får ho entré, kjøkken-allrom, bad med nisje til vaskemaskin, eit mindre soverom til seg og eit større til sonen.
Ni månader etter salsstarten i jula 2024, sikra ho seg den siste av denne storleiken. Ho tykkjer planløysinga er heilt genial.
– I og med eg har ein son som flyttar med meg, er det greitt med eit soverom med walk-in-closet, der han kan ha PC-rom.
Toppen står ledig
Etter kjøpet oppdaga Lindis at ho ikkje ser kva som skjer i den nærmaste sekstenmeteren, når Bryne speler kamp.
Derfor har ho vurdert å flytta opp i toppetasjen, som framleis er ledig. Halvannan månad før innflytting er 27 av 30 leilegheiter selde.
Dei tre siste kostar rundt elleve millionar kroner. Dei er svære, kjem med store terrassar og er aktuelle dersom Lindis vinn i lotto.
– Då hadde eg kjøpt der med ein gong, ler ho.
Alt på éin plass
Sjølv om Lindis ikkje var blant dei første som kjøpte då Øster Hus la ut prosjektet, er ho blant dei som har vurdert det lengst.
Faktisk heilt tilbake til då Team Bygg pusla med planar om ei blokk i Trallfavegen, som dei etter ein svært lang prosess gav opp i 2021.
Blokka var med i stadionplanen som politikarane behandla for første gong i 2012. Det tok fire år før dei endeleg kunne godkjenna han.
Lindis, som har vore fotballfan heile livet, kan hugsa folk som klatra opp på betongmuren i Klokkesvingen for å sjå betre.
Det var på den same muren at Øster Hus i 2021 hengde opp store skilt for å reklamera for sitt nyaste blokkprosjekt.
Lindis såg reklamen på veg til og frå arbeid. I Klokkesvingen får ho nesten like kort veg til arbeidsplassen som til butikken.
Coop Extra opnar i underetasjen i oktober, mens blokka blir klar for innflytting i november.
Klar for heimekamp
Det betyr at Øster Hus har halde framdriftsplanen dei sette ved gravestart i september 2024, då målet var å bli ferdige i 2026.
Utbyggaren måtte gjennom tre år med søknader og tilpassingar før kommunen vart tilfreds med kvaliteten på uteområda.
Prosjektet har fornya Trallfavegen og gjeve Bryne stadion ein ny inngangsport med leikeareal, og ein trimpark under stormskjermen.
Lindis seier ho har sjekka terminlista og er klar for innflyttingsfest sundag 8. november.
– Eg får med siste seriekampen til Bryne, heime mot Kongsvinger. Eg har allereie folk som har sagt dei vil koma til meg og sjå han.
