Familien Haukland bur på toppen av Lyefjell og passerer Monsanut barnehage på veg til og frå jobb.
– Førebels er dette førstevalet, seier Kristian Haukland torsdag ettermiddag.
To veker før søknadsfristen går ut, nytta foreldra til Kornelius moglegheita til å koma på besøk. Dei har ikkje vore på innsida før.
Martine Haukland, som sjølv jobbar i barnehage i Stavanger, veit kva ho skal sjå etter:
– Inntrykket av dei som jobbar her, korleis det ser ut her, kva dei gjer i barnehagen og korleis dagane er.
Dei har fram til 1. mars å bestemma seg. Det står mellom Monsanut og Vestly idrettsbarnehage, fortel dei.
– Det er vel eigentleg dei to som er mest aktuelle.
Følger magekjensla
Helene Monsen og Magnus Johnsen har med seg Henriette Viktoria, som startar i barnehagen til hausten. Men heller ikkje dei veit kor.
– Nei, og derfor er det greitt å koma rundt og sjå. Me har òg vore på Vestly og sett, fortel Monsen.
Også dei bur øvst på Lyefjell, som har Monsanut som sin nærmaste barnehage. Dei trekk fram uteområdet som eit stort pluss.
Henriette ser ut til å trivast med leikene på besøksdagen. Slike inntrykk er viktige når foreldra skal bestemma seg.
Éin av to på Lye
I januar og februar har barnehagane i Klepp, Time og Hå opna dørene for nye søkarar, Monsanut barnehage var éin av dei siste.
Styraren Berit Time Bø fortel at dei fleste gjer som foreldra til Kornelius og Henriette, og kjem innom før dei bestemmer seg.
– Mange søker kvalitet og kompetanse. Her har me og eit med vidareutdanning, seier ho.
Forutan private Sporvongane er Monsanut den einaste barnehagen på Lye. I fjor haust vart Lyefjell barnehage lagt ned som følge av eit politisk vedtak.
–Omtrent alle – personalet, barn og foreldre – vart med opp til Monsanut. Det handlar nok om at me har drive veldig godt og hatt gode foreldreundersøkingar, trur styraren.
Ni barnehagar på Jæren har hatt foreldreundersøking 2026. Dei fleste deltar kvart andre år, i fjor deltok 45 barnehagar:
Spesielt år
Samanslåinga av dei kommunale barnehagane på Lyefjell vart vedtatt av kommunestyret i september 2024.
Styraren seier at det tar tid å innarbeida endringar, men at det har gått godt, grunna informasjon til alle partar på førehand.
Ho laga implementeringsplanar der ho skisserte for foreldra, barna og personalet kva som skal skje i overgangen.
– Me hadde god informasjon ut på foreldremøte i forkant, og me begynte med felles personalmøte før flyttinga for å samkøyra oss pedagogisk. Barn fekk koma på besøk før sommaren og bli kjende. Dei fekk sjå uteområdet og gledde seg til nye ting.
Turid Fosse er éin av dei tilsette som vart med opp då Lyefjell barnehage vart slått saman med Monsanut barnehage i fjor haust.
– Det var ein overgang, men det går seg til. Det er to forskjellige personalgrupper som skal samkøyra seg. Omtrent alle ungane og foreldra følgde med opp, og det er kjekt, og så er det ein del nye.
Styrar Time Bø seier det har vore eit spanande år.
– Personalet har vore lojale, rause med kvarandre og gode til å jobba i lag. Ungane koser seg og trivest – og det er det viktigaste: at dei har det godt og trygt i barnehagen, at dei får læra og utvikla seg.
Ikkje garantert plass
Målet med samanslåinga var å redusera overkapasitet i kommunen, redusera driftsutgifter og kutta i framtidige investeringar.
Monsanut barnehage har 56 barn, 20 er småbarn. Dei aller fleste er frå tettstaden Lyefjell.
– Både dei nede og oppe søker seg hit, fortel Time Bø.
Ho kan ikkje lova plass til alle som set Monsanut på første plass.
– Det kan eg ikkje garantera. Det er søknadsfrist 1. mars, det er fullt i barnehagen og me har pågang. Eg trur dei ser kvalitet, omsorg og nærleik, lågt sjukefråvær, stabile vaksne og ei godt utdanna personalgruppe, seier styraren.
Time kommune skriv dette på sine nettsider:
- Tilbod om barnehageplass etter hovudopptaket blir sendt ut elektronisk i slutten av mars.
- Alle som har søkt og som ikkje får plass vil automatisk stå på venteliste til supplerande opptak
- Etter hovudopptaket er det supplerande opptak heilt fram til neste hovudopptak. Barnehagane vil ta inn barn frå ventelista så fort det blir ledige plassar
Det er felles opptak for alle barnehagane i Time kommune, både dei kommunale og dei private.
