Utval for lokal utvikling gjekk i februar med på at Pål Skjold Aune fekk bygga vidare på fundamentet han hadde starta på i Fjellsvingen.
I nabolaget er det ikkje opning for å bygga eigen carport, men politikarane gav han lov, mellom anna fordi naboane var positive.
Nå som byggverket nærmar seg ferdig, har naboane kontakta Time kommune for å uttrykka si bekymring:
«Vi i styret i Kuberget borettslag er bekymret for hva dette kan gjør med naboforhold og om det evt. lager presedens for andre liknende bygg i borettslaget vårt. Styret står for sin beslutning om å godkjenne en carport med de kriterier som ble gitt, ikke en garasje.»
Reagerer på tett bygg
Styret skriv til kommunen at dei har forsøkt å kontakta naboen, for å høyra kvifor bygget liknar meir på enn ein garasje enn ein carport.
Dei reagerer på at byggverket er tett og tilsynelatande eigna for garasjeport, dei er usikre på om dimensjonane stemmer med teikningane, og at det er kome til ei reiskapsbu.
Dessutan minner dei om at huseigaren skulle sikra innkøyringa til carporten på ein måte som gjer at burettslaget ikkje endar opp med færre parkeringsplassar totalt.
Huseigaren presiserer overfor Jærbladet at det siste er blitt sikra med ein skriftleg kontrakt, der burettslaget har fått overta hans gamle garasje i fellesanlegget.
Han seier òg at det har vore kontakt med burettslaget, skriftleg og munnleg, før og etter at styret sende brevet sitt til kommunen.
Kommunen ser kva naboane ser
Time kommune har følgt opp tipset og sendt brev til han. Byggesaksavdelinga skriv der at byggearbeida ikkje ser ut til å vera i samsvar med løyvet.
Dei godkjende byggeteikningane viser at fasaden mot sør og aust er lukka, mens størstedelen av fasaden mot nord og heile fasaden mot vest, er open.
Det er i tråd med ei ållmenn forståing av kva ein carport er.
Ordboka definerer carport som ein biloppstillingsplass med tak over – til skil frå ein garasje, som er ein bygning eller eit rom til å ha køyretøy i.
Ut frå bilda skriv kommunen at det ser ut som huseigaren bygger ein garasje med ei bu inntil. Utanom opninga er alle fasadane tette.
«Tiltakene er ikke utført med hensikt å omgå regelverket, men som tilpasninger innenfor det vi oppfattet som rammen for det godkjente tiltaket», skriv huseigaren til kommunen.
Open front
– Må me må gjera endringar på bygget vårt, så gjer me det, seier Pål Skjold Aune til Jærbladet.
Men han både trur og håper at det ikkje blir nødvendig.
I brevet forklarer han at hensikta heile tida har vore å bygga den carporten han fekk løyve til å setta opp. Han presiserer at intensjonen aldri har vore å oppføra ein garasje eller noko anna enn det dei oppfatta var omfatta av løyvet.
Under bygginga vart det gjort «enkelte tilpasninger basert på byggtekniske anbefalinger», forklarer han i brevet, knytte til stabilitet, bereevne og etablering av sedumtak.
Det vart også lagt vekt på estetisk utforming, skriv han.
«Vår oppfatning var at disse tilpasningene ikke endret byggets karakter som carport, i og med at den fortsatt i all hovedsak har åpen front.»
Sette opp bu
Undervegs såg Aune og kona behovet for meir oppbevaringsplass og bestemte seg for å setta opp ei bu.
Dei kunne sett bua opp som eit sjølvstendig tiltak på eigedommen, skriv dei til kommunen, men dei ønskte ei løysing som gav eit heilskapleg uttrykk.
– Eg har tolka det slik at ei bu på ni kvadratmeter ikkje er søknadspliktig. Så får me sjå kva dei tenker om det i kommunen, og ta det derifrå, seier Aune til Jærbladet.
Han avsluttar brevet med at han er innstilt på konstruktiv dialog med kommunen dersom byggesaksavdelinga treng nærmare avklaring eller formell behandling.
Overfor Jærbladet er han usikker på kva utfallet blir. Han trur ikkje saka endar med at han må riva eller gjera store endringar på byggverket.
– Dette er noko eg ikkje har gjort før, så det er eg usikker på. Men ut frå det eg har lese meg opp på, ser det ut til at eg kan gjera ei endring i søknaden, viss dei definerer det som garasje i staden for carport.
