– Me ville feira fellesskapet og samhaldet her i burettslaga våre, seier Marte Hagerup Røken i arrangementskomiteen.
For noverande og tidlegare bebuarar
Laurdag ettermiddag var det pynta til fest i burettslaga Dalen og Jubevollen på Bryne. Flagga vaia frå balkongane, og det var hengt opp vimplar og kunstverk.
Mellom garasjane var det rigga til som ei gigantisk utestove – med mogelegheit for å søkja ly både i partyteltet og i fleire fint innreia garasjar – og det var sett fram god mat og god drikke.
Årsak: 7. september i år var det 50 år sidan dei to burettslaga blei stifta.
Bygginga av og innflyttinga i dei totalt 60 bueiningane skjedde deretter over rundt to år.
– Me har invitert alle som bur her no. Samtidig har me prøvd å få spreidd ryktet om festen til dei som har budd her tidlegare. Dei er også inviterte, fortel Fjóla Helene Særheim i arrangementskomiteen.
Dei har jobba i tre månaders tid med den store festen, og var godt nøgde med oppmøtet og stemninga laurdag.
Burettslaga i Rosseland-krinsen var også glade for å få besøk av Jærbladet, som berre har vore på besøk ein einaste gong før i løpet av dei 50 åra, har dei funne ut.
Oppslaget frå 14. november 1978 slår fast at dugnadane med å få bygd tre leikeplassar har vore ein stor suksess – og no heng ei utskrift sentralt plassert på festområdet.
Har budd her sidan huset var nytt
Ein av deltakarane på festen laurdag var Lulla Worsøe, som er den einaste som har budd i burettslaget sidan det var nytt.
Ho flytta inn i februar 1977, fortel ho, og ho trivst godt i Dalen burettslag.
– Det er eit paradis, slår ho fast.
Lulla trekkjer fram at det er eit stille og trygt nabolag, der folk kjenner kvarandre, og mimrar tilbake til tida då ungane brukte hagen hennar ut mot friområdet som snarveg. Det var ein god måte å bli kjend med dei på.
Ho set også pris på at tidlegare naboar har teke turen til 50-årsfesten for burettslaget.
– Sjølvsagt måtte eg vera med her i dag. Det er festleg at dei unge set i gang med ei slik feiring, seier Lulla Worsøe.
