Medan Klepp og Time har satsa på eigne dunkar for hageavfall til sine innbyggjarar, har Hå – for å halda kostnadane nede – valt å oppmoda sine innbyggjarar til å kompostera, eller til å levera inn hageavfallet på mottaksstasjonen Pytten på Nærbø.
Men no har dei også lagt til rette for mottak tre andre stader i kommunen, og dei opnar 1. mai, melder Hå kommune på Facebook.
– Frå 1. mai opnar me tre ubetente mottak for hageavfall, som eit prøveprosjekt, heiter det i meldinga.
Til og med 30. september kan private hushaldningar/innbyggjarar i Hå kasta hageavfall døgnet rundt, sju dagar i veka i Sirevåg (Nylund industriområde), Stokkalandsmarka industriområde og Varhaug (Tjemslandsmarka industriområde).
– På alle dei tre plassane finn du ein oppmura firkant/utesilo der du kan tømma tilhengaren, bagasjerommet, trillebåra, plastposen eller kva du måtte bruka til å frakta hageavfall med, heiter det i meldinga frå kommunen.
I desse mottaka kan du kasta ting som plengras, ugras, blomar, lauv, små greiner og restane av hekken.
– Har du anna avfall enn hageavfall, må du levera dette til gjenvinningsstasjonen på Nærbø, skriv kommunen på Facebook.
Gjenvinningsstasjonen Pytten på Nærbø tek også imot hageavfall i opningstidene.