Opna skutefesten med ny Sirevåg-song

Marta Mari og Joakim Engeland har gått gjennom skogen med ungane, Tante Sofie og Kaptein Sabeltann.

Vanlegvis heiter dei Johannes og Maria, men laurdag er ingen vanleg dag.

Det er dagen då Tall Ships' Races kom tilbake til Sirevåg.

Og når det skjer noko i Søre Hå, må dei sjølvsagt ut, seier Marta Mari.

– Me synest det er heilt fantastisk med denne dagen. Det er veldig gildt at me får vist fram bygda, og at det er så mykje liv. Det kjem båtar frå heile verda, nesten.

Vêret er fint, påpeikar ho, og det er eit stort pluss: Her er 20 grader og solgløtt.

– Så det er stor stas. Ein folkefest, seier Marta Mari.

Finast i sør

Ordførar Andreas Bjorland er frå Nærbø, men må innrømma at Hå berre blir finare og finare, di lengre sør han kjem.

Og sjøen, landskapet og den nyleg oppgraderte Vågen er sjølve prikken over i-en, seier han, då han ønsker velkomen.

Ordføraren nærmast instruerte ungane til å nytta moglegheita til å drikka brus og eta snop, is og sukkerspinn.

Så dette blir ein skikkeleg fest, som han takka frivillige, idrettslag, sponsorar og arrangørkomiteen for å få i stand.

Han oppmoda publikum til å nyta dagen og å bruka pengar, før han inviterte Øystein Ellingsen opp på scena.

Saman med Ingvar Hovland har han nyss komponert ein Sirevåg-song, som fekk opna laurdagens arrangement.

Ærefullt oppdrag

– Det er klart det blir eit ærefullt oppdrag. Det er veldig kjekt å få ein slik førespurnad. Eg er spent på korleis folk vil motta låten. Spent og litt nervøs, sa han til Dalane Tidende fredag.

Og presentasjonen dagen etter gjekk bra – med unntak av ein konfrontasjon med ein veps, midtvegs i songen.

Heile familien ute

Knut Holter og Berly Holter frå Stavanger er på hytta i Sirevåg. Dei har gode minne frå sist Tall Ships' Races var innom, for to år sidan.

Laurdag har dei med barnebarna: Knut Holter Vae, som har reist ned frå Etne, og Sigurd og Vilja Holter Haug frå Stavanger.

Før opplegget startar på scena har syskenbarna fått kvar si pølse. Etterpå blir det is.

– Det er ikkje noko tungt program for dagen, seier bestefaren.

Skuter frå nesten heile verda

Anne Ofelia Haus og Clara Zita Lind kom sjøvegen til Sirevåg, frå Aberdeen.

– Det er litt av ei oppleving. Det er spanande å prøva noko nytt, seier dei.

Etter ti overnattingar, og åtte dagar på reis, skal dei enda opp i Kristiansand, heimbyen til Anne.

Årets skuter: