– I barnevernsrapporten kan ein lese eit kort avsnitt om at det er høg . Det er i alle fall ikkje ei overdriving, sa Martin Wiig Haukali (V).
Han viser til at Jærbladet i januar skreiv at 13 av 21 tilsette ved barnevernstenesta i Klepp hadde slutta i jobben i løpet av 2024.
To pensjonerte seg, medan elleve gjekk vidare til andre jobbar.
I samband med saka, stadfesta verneombodet ved barnevernstenesta overfor Jærbladet at det var utfordringar knytt til det psykososiale arbeidsmiljøet i barnevernet.
– For at me som folkevalde skal kunne gjere ein god jobb, er det viktig at saksgrunnlaget me har er godt, og at det som skjer i kommunen er mest mogleg transparent, sa Haukali.
– Det vil eg ikkje seie det er i denne rapporten. Her burde ein tatt med desse tala.
Kalla saka ekstraordinær
I kvalitetsmeldinga som blei lagt fram i mai, kjem det tydeleg fram at utskiftinga av tilsette har vore høg.
Meldinga går ikkje inn på eventuelle forklaringar på kvifor, ut over at høg turnover « ... ikke er unikt for barnevernstjenester generelt».
Den inneheld ikkje tal over kor mange som har slutta.
Rapporten seier at leiinga har hatt søkelys på tilsettingar og å stabilisere personalsituasjonen. Sjukefråværet har stige frå 5 prosent i 2023 til 13,8 prosent i 2024.
Den viser også til at barnevernstenesta har eit kvalitetsteam, som ifølgje leiaren skal ha fire årlege møter og vere eit sentralt organ for medverking og kvalitetsutvikling.
Det blei bestemt å gjennomføre ei medarbeidarundersøking våren 2025, seier den.
«Det er forventet at det settes inn tiltak etter denne er gjennomført for å forebygge høyt sykefravær, turnover og sikre et stabilt arbeidsmiljø».
Haukali skildra situasjonen i barnevernstenesta som «særs ekstraordinær». Ordførar Kjetil Maudal (Frp) har også tidlegare uttalt til avisa at det ikkje er normalt og ikkje optimalt med så mange tilsette som sluttar.
– Ingen nye kommentarar
Jærbladet stilte spørsmål til kommunen, ved Gry Susanne Hetlelid, om kva dei tenker om utsegnene til Haukali og om dei er einige i at rapporten ikkje er transparent.
Avisa spurte også kvifor tala på tilsette som slutta ikkje er tatt med, og kva dei i rapporten meiner med at høg turnover ikkje er unikt for barnevernstenester generelt, sett i lys av situasjonen i Klepp sitt barnevern.
– Me har ingen nye kommentarar til dette, skriv Hetlelid i ein SMS.
Ho var konstituert kommunalsjef for barn og unge i mai 2024, då Jærbladet først omtala at 8 av 21 tilsette hadde slutta sidan nyttår.
Hetlelid sa då til avisa at ho ikkje såg det som problematisk at så mange hadde sagt opp i løpet av fem månader.
– Dette er ein naturleg del av ein fri arbeidsmarknad. Me har fått alle stillingar raskt besett av godt kvalifisert personell. Per no er det ingen ledige stillingar innan barnevernet i Klepp, sa ho.
I januar skreiv kommunedirektør Torild Lende Fjermestad til Jærbladet at kommunen har gode rutinar for rapportering og oppfølging av barnevernet i Klepp, både politisk og administrativt.