Det begynte klokka 19:30, då Utrykningspolitiet stansa ein bil i Grødelandsvegen. Bak rattet sat ein mann i slutten av 40-åra. Politiet mistenker at han køyrde i ruspåverka tilstand og har beslaglagt førarkortet hans.
Ein halvtime seinare var det fartskontroll i Langgata på Vigrestad. Der måtte ein mann i 20-åra gje frå seg førarkortet etter å ha blitt målt til 90 kilometer i timen i 60-sona.
I 21-tida kom det melding om ein UP-kontroll i ei 80-sone på Buevegen. Her fekk heile 18 sjåførar forenkla førelegg for å ha køyrt for fort. Ein sjåfør køyrde i 131 kilometer i timen. Det var så fort at politiet melde han og beslagla førarkortet.
Ein annan sjåfør hadde mista førarkortet på grunn av den samla prikkbelastninga.
Rett etterpå sette UP opp ein laserkontroll i Sveinsvollvegen på Voll. I samband med denne kontrollen beslagla politiet to førarkort og skreiv ut fire forenkla førelegg. Den høgast målte farten var 89 kilometer i timen i 60-sona.
På Nærbø blei ein gut under 18 år på lett motorsykkel stansa etter å ha blitt målt til 84 kilometer i timen i ei 60-sone.
– Verge blei informert, opplyser politiførstebetjent Morten Slettebø til Jærbladet.