– På ein måte kjendest det veldig riktig, då det er ei avgjerd me har brukt nokre år på å ta. Samtidig var det veldig rart, seier Camilla Ystanes.
– Men aller mest var det ein veldig fin dag og framsyning, presiserer ho.
Ystanes og Marianne Kåstad starta teatermiljøet saman i oppstartsåret. Duoen har vore primus motor heile vegen, saman med Trine Marie Abelsnes som kom til seinare.
Dagleg leiar Kåstad er bortreist på ei jobbreise når Jærbladet tar kontakt, men Ystanes har moglegheit til ein prat.
– Aller mest er me stolte av det me har gjort og av alle dei fine folka me har hatt med oss i desse åra, seier ho.
– Gir oss medan leiken er god
Dei to eldsjelene var engasjert i teatermiljøet på Undheim då dei i 2010 fann ut at dei ville lage teater i eigen by. Begge hadde små ungar som stod på venteliste i kulturskulen.
– Me tenkte at me kunne lage noko sjølv til dei, og sette derfor opp Reisen til julestjernen. Dette var det stor interesse for, og det utvikla seg til at me starta teater- og dansegrupper for å lage noko til ungane og andre på deira alder. Kursa vaks raskt, mimrar Ystanes.
Opp igjennom åra har Fantefølge sete opp produksjonar som Annie, Jul i svingen, I blanke messingen og Pippi.
I jula er planen å setje opp Reisen til julestjernen i Storstova ein siste gong. Men først, før sommaren, er det avslutning for dei ni gruppene som har fått opplæring gjennom heile året. I kvar gruppe er det mellom 10 og 15 elevar.
Dei anslår at over tusen barn og vaksne på Jæren har vore ein del av Fantefølge. Mange er oppvaksne i lokala, og har blitt instruktørar seinare.
– Me vil gi oss medan leiken er god, seier Ystanes.
– 16 år er lang tid, og våre eigne barn er blitt store. Me har brukt mykje tid på dette, og ser at me treng å bruke tida på andre ting.
Nok til fulltidsjobbar
Både Ystanes og Kåstad har jobbar utanom, og driv teateret som ein sidesyssel.
Fantefølge skildrar Ystanes som ein frivillig organisasjon. Utanom enkelte honorar, har dei to pådrivarane brukt store delar av fritida si på aktivitetane, som sidan 2016 har hatt base i Eikhigårdens loftsetasje.
– Kursgruppene for barn blir finansiert gjennom deltakaravgift, tilskot frå Time kommune og forskjellige støtteordningar. Førestillingane blir drivne gjennom billettinntekter og støtte frå lokalsamfunnet, for eksempel bankane sine gåvefond, fortel ho.
Instruktørane mottar løn, men store delar av drifta er basert på frivillig arbeid frå mange engasjerte medarbeidarar.
– Både eg og Marianne har jobba redusert gjennom åra for å kunne drive organisasjonen. Det kunne fort vore ein fulltidsjobb med tanke på kor mykje arbeid som blir lagt ned over mange helger i lange periodar. Det hadde jo vore draumen, seier Ystanes.
– Å drive ein slik organisasjon er jo på ein måte ein livsstil. Ungane har vakse opp i det, og mennene våre har vore med og bygga alle kulissene me har brukt. Det har vore ein veldig stor del av livet.
Opne for at andre vil ta over
Danseframsyninga i Storstova tysdag kveld markerte slutten på dansegruppene. Laurdag 30. mai skal teatergruppene vise kva dei har jobba med på Jadarheim.
Sjølv om organisasjonen ikkje kjem til å halde oppe den daglege drifta, er ikkje planen at den skal slettast formelt.
– Viss me sjølv eller nokon andre plutseleg får lyst å setje opp ein produksjon, er det mogleg, forklarer Ystanes.
– Kva om nokon vil ta over drifta?
– Det hadde me syntest var veldig kjekt. Me har opna for det og prøvd, men ingen me veit om er klare for å ta den biten.