Sjå bilda frå løpet som blei så populært at arrangøren måtte seia stopp

Over 300 ungar var påmelde, men det var enno plass til fleire i søndagens løp, kunne Jærbladet melda fredag. Og då begynte snøballen å rulla.

– Me måtte seia stopp ved 360 påmeldingar, men det blir nok litt fleire som kjem til å springa, og me har heldigvis nokre ekstra medaljar i bakhand, fortel Tore Kåstad i Voll IL.

Idrettslaget sin tanke bak løpet er å skapa blest om den ferske friidrettsgruppa i Voll IL, der tanken er å få draghjelp av suksessen til bygda si eiga superstjerne Narve Gilje Nordås. Løparen var oppteken på anna hald søndag ettermiddag, og kunne ikkje stilla i Plogenparken, men det gjorde altså over 360 barn – i følgje med minst like mange vaksne.

Til gjennomføringa av barneløpet i Plogenparken hadde idrettslaget fått med seg Jæren Sparebank og Klepp kommune som medarrangørar.

Løpa var delt inn i ulike klassar, i alderen null til 12 år, og løpa blei lengre jo eldre deltakarane var. Etterpå var det medaljar til alle.