Sjå bilda: Turnfest på Jæren

– Det er ein sprek gjeng, men det beste med denne gjengen er at ingen treng å vera perfekte, sa stemneleiar Jeanette V. Tuen då søndagens marsj til korpsmusikk gjennom Ognas gater var over, og turnarane begynte å gjera seg klare til oppvisninga som avslutta det 95. krinsturnstemnet for vaksne turnarar og gymnastar i Rogaland.

– Her kjem me med den kroppen me har, me dei kleda me har, med dei hoftene me har og kanskje også den ryggen me har etter mange år på jorda, sa Tuen frå arrangørklubben Brusand IL.

For ein ting er sikkert: Få idrettsarrangement har så stort spenn i alder blant deltakarane som eit krinsturnstemne. Det var også stort spenn i geografi, med deltakarar frå klubbane Egersund, Frøyland, Ganddal, Haugesund, Havørn, Klepp, Nærbø, Randaberg, Sauda, Sola, Tasta, Vardeneset, Voll, Ålgård, Brusand og ein tilreisande gjestetropp frå Bamble i Telemark.

Turnhelga starta laurdag med treningar, fest – og overnatting på Ogna skule for mange av deltakarane. Søndagen var det marsj med korpsmusikk gjennom Ognas gater, før stemnet blei avslutta med turnoppvisning ute på fotballbanen.

– Me har hatt det heilt fantastisk. Eit veldig godt arrangement, slår Tone Johannessen Røksund frå Sola Turn fast overfor Jærbladet.

Ho er trenar for ein av gruppene som deltok på oppvisninga: kvinner veteran-laget til Rogaland Gymnastikk- og Turnkrets, som har medlemmer frå Brusand, Sola, Haugesund og Vardeneset.