– Me bruker aktivitetsparken mykje, og det er så kjekt å vere her når det er fint vêr, seier kleppsbuen Monica Horpestad.
Saman med dottera Julie Hovland Horpestad leiker ho sisten rundt klatrestativet i aktivitetsparken, som opna i Klepp i fjor.
– Ho elskar å sparke på sparkesykkel, skate og stå på rulleskøyter, seier mora.
Modige 3-åringar på skatebanen
Idar Eriksen og Julie Falkeid har tatt med seg ungane sine Emrik (6) og Oline (3), som står på sparkesykkel og skateboard i skateparken.
Familien har godt selskap av Ruben Helmsgård og Viviann Isachsen, og ungane Erica (3) og Luke (5).
«Good vibes only»
Padelbanen er også i bruk når Jærbladet tar runden i parken rundt klokka 18. Utanfor sit Martyna Bell og Natalia Zygola, som har tatt seg ein pause.
– Det er fantastisk med sola. «Good vibes only», ler Martyna, som er busett i Klepp.
Jose Matias er å finne ved treningsapparata. Han kjem frå Spania, og fortel at han flytta til Klepp i januar. Han og kjærasten har kome hit på grunn av jobb, men også fordi dei liker å reise.
Sannsynlegvis blir dei buande eit par år, før dei flytter til eit nytt land.
– På vinteren var det berre eg i parken. Det ser ut som at folk i Klepp og kanskje Skandinavia gøymer seg på vinteren, og kjem fram på våren, ler han.
Reiser frå Sandnes
Fleire Jærbladet møter bur i Sandnes. Emmely Rolfsen (8) kjem med storesøster Sofie Rolfsen og Kristian Holden. Ingen av dei har vore her før.
– Det er godt at sola endeleg er framme, og det er kjekt å sjå mange folk i parken, seier sistnemnde.
Også Espen Holden med ungane Aurora Helen Rinaldo (9) og Thomas Holden (5) blei med.
Asgeir Nærland og dottera Marie Nærland, som også har tatt turen frå Sandnes, er derimot faste besøkande.
– Me bruker parken ein del. Det er veldig stas, seier far.
