Inntektene i Alfie Haaland-selskapet Sapiens AS auka frå 93 millionar til nesten 240 millionar kroner i 2023. Årsresultatet auka frå 54 millionar til 151 millionar korner.
Selskapet driv agentverksemd knytt til sportsleg og kommersiell av idrettsutøvarar og investeringar i verdipapir, står det i årsrapporten.
Sjølv om årsrapporten omtaler utøvarar i fleirtal, er det i hovudsak 24 år gamle Erling Braut Haaland det er tale om. Han har vunne Premier League i begge sine første sesongar i England, i 2022–23 og 2023–24.
Styret har tru på selskapets framtidige utvikling og resultat, som er avhengig av «antall tidsbegrensede avtaler med utøvere samt innholdet i disse», det vil seia kontraktar med klubbar og sponsorar.
Næringslivsavisa E24 omtalte rekneskapen først.
Aktivitet i Europa
Sapiens AS har registrert hovudkontor i Forum Jæren på Bryne, men verksemda skjer hovudsakeleg andre stader i Europa der utøvarane har sine sportslege og kommersielle aktivitetar.
Rekneskapen er i norske kroner, men inntekter og utgifter er i hovudsak i utanlandsk valuta.
Egil Østenstad, tidlegare landslagspelar og Viking-spiss, er styreleiar. Alfie Haaland er styremedlem.
Frå mai 2023 har Alfie Haaland hatt bustadsadresse i Haus Arve, i den sveitsiske alpelandsbyen Andermatt.
I 2021 skatta han 2,17 millionar kroner til Time kommune, ifølge skattelistene. Då stod han oppført med ein formue på cirka 36 millionar og inntekt på nesten seks millionar.
Store finansinntekter
Tyrannus AS eig hundre prosent i Sapiens AS. Alfie Haaland eig hundre prosent i dette selskapet også.
Sidan 2010 har føremålet vore «investering i verdipapir, kjøp, salg og utleie av eiendommer, samt deltagelse i andre virksomheter av enhverart».
Årsresultatet i 2023, som inkluderer finansinntektene, er på 159,4 millionar kroner, opp frå 52,5 millionar i 2022.
Selskapet har kjøpt aksjar for 124,4 millionar, ifølge ein note i rekneskapen, med ei resultatført verdiendring på totalt 6,7 millionar kroner.
Eigenkapitalen i selskapet var per 31. desember 257,9 millionar kroner.
I styret sit leiar Egil Østenstad, Alfie Haaland og Astor Haaland.