– Me er ganske mykje heime i ferien i år. Då er det gildt å kunna fylla dagane med kjekke aktivitetar og ting som skjer. Me hadde høyrt om denne skutefesten, som freista med liv og røre, god stemning og kjekke aktivitetar, seier Sigrid Haugstad Harbo.
Ho står på dekket til staselege «Sørlandet» saman med systera si Anne Wilhelmsen, som har lagt fredagsturen til herlege Hå. Ho er utflytta vigrestadbu og busett i Stavanger.
På éin time har gjengen nådd å besøka fleire av seglskutene, treffa på kjentfolk i marknadsgata og høyra musikk frå scena.
Sebastian (12), Joshua (11) og Sophia (11) har prøvd fleire aktivitetar for barn, som inkluderer klatretårn, stempeljakt og båtsnikring i regi av Jæren kystlag og leikar i regi av Hå kommune. Seinare på dagen blir det palleløp ute i vågen.
Starten på dagen har rett og slett vore ganske innhaldsrik. Derfor er det ingen tvil om kva som er neste punkt på programmet.
– Me har gått og kjent på masse god matlukt, slik at me nesten ikkje kan venta med å få kjøpt oss noko mat, seier Haugstad Harbo.
Gjengen har mykje å velja mellom – både Pauserommet, Bogsdalen gard, slaktaren R. Skretting, Sirevåg velforening og Brusand IL har servering, alt frå vaflar til grillmat og fiskesuppe.
Ståande applaus for demenskoret
Arrangementet starta klokka 12:15, då nederlandske «Morgenster» kom glidande inn vågen og ordførar Jonas Skrettingland ønskte velkomen.
Han overlét scena til konferansier Monica Cecilie Høien, som introduserte dagens første musikalske innslag: Hå kommune sitt eige demenskor, Den glade sanger, som heldt sin andre konsert på kort tid.
Etter at koret hadde innkassert ståande applaus, vart publikum lova nye musikalske innslag kvar time fram til klokka vart 17. I kveldinga, klokka 19, står artisten Rita Eriksen på scena.
Ståande applaus for demenskoret:
Storfint, uoffisielt, besøk
Tall Ships Races sin venskapsetappe går i år frå Fredrikstad til Lerwick, med eit uoffisielt stopp i Sirevåg på halvvegen.
To av dei tre store norske var mellom seglskutene som klappa til kai: «Sørlandet» frå Kristiansand og «Christian Radich» frå Oslo.
På fleire av skutene vart publikum inviterte til å koma om bord.
Desse skipa besøkte Sirevåg:
- «Christian Radich» (Norge)
- «Sørlandet» (Norge)
- «Morgenster» (Nederland)
- «Dar Młodzieży» (Polen)
- «Capitan Miranda» (Uruguay)
- «Betty» (Danmark)
- «Patricia» (Belgia)
- «Roald Amundsen» (Tyskland)
- «Westvind af Göteborg» (Sverige)
- «Alexander von Humboldt II» (Tyskland)
- «Alba Explorer» (Storbritannia)
- «Lietuva» (Litauen)
