Sundag kveld stilte Utrykkingspolitiet seg opp i 80-sona langs Buevegen for fartskontroll, melder operasjonsleiar i Sør-Vest politidistrikt kort tid etter.
Ni førarar som blei vinka til side, vedtok forenkla førelegg for å ha køyrd for fort. Den høgast målte farten var 109 kilometer i timen.
I tillegg er ein mannleg bilførar i 40-åra mistenkt for promillekøyring etter å ha blitt stoppa i kontrollen.
Kontrollen blei avbroten då ein motorsyklist kom forbi. Han stoppa ikkje – og ville tilsynelatande unndra seg kontroll.
– UP-patruljen køyrde etter og fekk stoppa han, opplyser politioverbetjent Morten Slettebø ved Jæren politistasjon.
MC-føraren, ein mann i 40-åra, er meld for køyring i påverka tilstand og køyring utan gyldig førarkort.