– Det er frustrerande at me må parkere langs vegen, seier June Telstø Maudal.
Ho er tilsett i barnehagen, men også mor til to ungar der.
Problemet gjer seg særleg gjeldande i leverings- og hentetida. Då blir parkeringa fort fullt opp, ifølgje Maudal.
– Når eg går åleine med to små barn, går det ut over sikkerheita. Klokka 08 på morgonen kjem det ganske mange bilar langs vegen her, seier ho.
Skal ha stått stille i vekevis
Renate Fenne, dagleg leiar i Kleppestemmen FUS, deler bekymringa til kollegaen sin.
Barnehagen, som rommar 50 ungar, ligg ved ei ferdselsåre som fører til eit bustadfelt. Blant bilane som køyrer forbi er ein del større lastebilar, ifølgje Fenne.
Det er langs denne vegen foreldra ser seg nøydde til å parkere når det er fullt.
– Det er skummelt, seier Fenne.
Det er skilta om at parkeringa er reservert barnehagen mellom klokka 07 og 17. Likevel opplever dei tilsette at framande privatbilar og arbeidsbilar har begynt å stå parkerte i heile opningstida.
Nokon av bilane skal ha stått i fleire veker utan å ha vore flytta på. Andre blir gjerne parkerte i 15-tida – midt i barnehagens henterush.
Særleg sidan i vår skal problemet ha tatt seg opp, sjølv om det allereie var til stades då Fenne starta som leiar i mars 2025.
– Det har vore utfordrande ganske lenge, seier ho.
– Under leveringa i 08-tida er det heilt fullt. «Alle» leverer som regel samtidig, og då er det litt kaos.
Kommunen: – Kjem til å ta kontakt med bileigarane
I håp om å få bukt med parkeringsutfordringa, har barnehageleiaren sendt eit brev til Klepp kommune.
Ho håpar at kommunen for eksempel kan sende ei parkeringsvakt som kan sette opp varsel om borttauing eller bot.
Kjersti Marita Ohr, som er kommunalteknisk sjef i Klepp kommune, bekreftar overfor Jærbladet at kommunen eig parkeringsplassen.
– Me kjem til å ta kontakt med bileigarane som parkerer på dagtid, og informere om at dei ikkje kan stå der på dagtid, seier ho.