«Politikken har lært meg enormt mye, både på godt og vondt. Det kjekkeste av alt er å få være med og ta trygge og gode valg som gjør Time kommune til et enda bedre sted å bo. Jeg er veldig takknemlig for disse årene», skreiv Pål Undheim i eit innlegg på Facebook-sida si torsdag.
Der kunngjorde 35-åringen at han gir seg i politikken neste år, når det er kommuneval.
– Åtte år er lenge nok. Eg begynner å få litt vaksne ungar som treng at eg følgjer med på fotballen. Dessutan driv eg eit ganske stort byggefirma, seier Pål Undheim til Jærbladet.
Han tenker på familiefirmaet P Undheim AS, som hadde 33 tilsette og ei omsetting på 92 millionar i 2025.
Avgjerda tok han for ei stund sidan, skreiv han på Facebook. Men han har takka ja til å bidra i valkomiteen til Time Høgre, som skal «finne det neste A-laget til Time Høyre. Som sammen med Andreas Vollsund forhåpentligvis skal være med å styre de neste 4 årene».
«Nå ser vi etter deg! Har du lyst til å bidra, eller kjenner du noen som burde?» skreiv Høgre-politikaren.
Skulle bli leiar
Pål Undheim har sete to periodar som medlem i utval for lokal utvikling i Time. I starten av andre periode, etter valet i 2023, peikte Høgre på han som ny leiar i utvalet.
Då gjorde Jærbladet ei oppteljing av kor mange gongar Undheim, i første periode, måtte gå og setja seg bak i lokalet for å gi plass til eit varamedlem som kunne vera med og avgjera om han var inhabil.
Ei oppteljing av protokollar frå 36 møte i den første perioden viste at Undheim hadde stilt spørsmål om eigen habilitet 24 gongar. 18 gongar bestemte utvalet at han var inhabil, fordi han hadde eigne interesser i sakene det gjaldt.
Etter dette valde Undheim på eige initiativ å trekkja sitt kandidatur som leiar, men heldt fram som medlem av Høgre si gruppe i utvalet.
– Magefølelsen var at det ikkje var så lurt at eg skulle vera leiar. Dette kommenterte andre òg. Det ville blitt mange saker der ein vara ville ha måtta leia møte. Og Høgre hadde vel så flinke folk som kunne gjera denne jobben, så den avgjerda var rett, seier Undheim til Jærbladet.
Står bak datasentertomta
I første periode vedtok kommunestyret ein detaljplan for næringsområdet på Undheim. Pål Undheim var erklært inhabil då utvalet behandla denne.
I den inneverande perioden har Green Mountain gått i gang med å byggja datasenter på denne tomta. Saman med faren Preben Undheim arbeider Pål Undheim for å utvida dette området vidare og for å realisera eit biogassanlegg i nærleiken.
I den nåverande valperioden har utvalet tatt stilling til habiliteten hans 13 gongar, viser Jærbladets siste oppteljing. Han har vore inhabil i 10 av desse gongane.
Undheim har dermed vore inhabil i utvalet 28 gongar på desse åra.
Det er ikkje berre i saker knytte til datasenter at Pål Undheim har vore inhabil. Han er dagleg leiar i fem selskap og sit i styret i 13 andre, i eitt av dei som styreleiar.
– Kvifor trekte du deg ikkje etter første periode i politikken?
– Då var eg akkurat begynt å bli varm i trøya og kjend med systemet. Det hadde vore pandemi i nesten to år, med heimemøte. Då mangla litt av feelingen det er å vera med. Det har vore lærerikt, kjekt og ekstremt givande å setta seg inn i alt, og å måtta forhalda seg til det totale bildet. Ting er ikkje svart-kvitt.
– Kvifor har du så mange selskap?
– Kva skal eg svara på det? Eg har ulike prosjekt med ulikt risikobilde og krav til samarbeid. Ideelt skulle eg kanskje samla alt i eit selskap, men sånn fungerer det ikkje i dag. Me samarbeider med mange forskjellige folk og må ha ulike eigarkonstellasjonar.
– Engasjementet mitt er i bygg
– Korleis har det vore å vera lamma i politikarrolla så mange gongar på grunn av dette?
– Det varierer veldig. Nokre ting har gått bra, andre ikkje så bra. Men i Høgre var me ærlege om dette med ein gong. Eg har gått ut av gruppemøta. Eg veit faktisk ikkje utfallet av desse sakene før eg sit bak i salen på utvalsmøta og høyrer om det. Eg kunne sjølvsagt ønskt at eg kunne ha vore meir aktiv. Men det har vore ei grei løysing.
– Kunne du ikkje heller ha brukt engasjementet ditt i eit utval som ikkje stelte med alt du driv med profesjonelt, som helse eller skule?
– Eg har rett og slett ikkje den typen engasjement. Det er ikkje det som ligg meg nærmast. Min kunnskap er bygg. Ein må ha folk inn som kan dette òg. Me får mange gode vedtak basert på ein god diskusjon, der eg drar min veg og SV sin, seier Pål Undheim.
– Inhabilitet er normalt
Inhabilitet i politikken, både lokalt og på Stortinget, er heilt normalt, seier ordførar Andreas Vollsund (H).
– Det er ikkje ulovleg å vera inhabil. Det viktige er måten ein handterer slikt på. I Høgre har me vore svært nøye på dette i lengre tid: I gruppemøta våre får inhabile ikkje eingong sitja i møterommet, seier Vollsund til Jærbladet.
– Ein ressurs det er dumt å mista
Han synest det er dumt å mista Pål Undheim i lokalpolitikken.
– Han er ein veldig flink mann som er godt kjend i kommunen og som gjorde eit veldig godt personval. Pål er ein ressurs. Men eg forstår og har respekt for valet hans nå, seier ordføraren.
Den inhabile er den som veit mest om ei sak, blir det sagt. Pål Undheim har vore i utvalet som jobbar med sakene han ofte sjølv veit mykje om. Det gjer han nettopp fordi han har interesser i dei som næringslivsmann.
Dette er ikkje noko stort problem, ifølge ordføraren. Alt handlar om korleis ein handterer dei konkrete situasjonane.
– Det er viktig at alle samfunnsledd er representert i politikken. Me har lærarar, rektorar og utbyggarar. Blandinga av folk er det som er demokrati. Når lærarar sit i utval for levekår, vedtar dei sine eigne budsjett. Handtert på rett måte, er dette ikkje noko problem. Alle vil oppleva å vera inhabile i blant, også eg, seier Andreas Vollsund.