– Eg kan stadfeste at søksmålsvarsel har gått frå Bane Nor. Utover det har vi ingen fleire opplysingar eller kommentarar å komme med på dette tidspunktet.
Det skriv leiar for ekstern kommunikasjon i Bane Nor, Stine Smemo Strachan, til NRK.
Godsvogner krølla seg saman
Det var mars 2024 at eit godstog eigd av OnRail AS køyrde i høg fart forbi eit raudt lys, og spora av på ein sporvekslar ved Arnanipatunnellen på Arna stasjon.
Fleire av godsvognene krølla seg saman i ein «trekkspeleffekt».
Godstoget kom frå Bergen, og i motgåande retning kom eit passasjertog med 170 passasjerar. Det stoppa 500 meter frå ulykka og vart ståande inne i tunnelen i fleire timar.
Ingen personar blei alvorleg skada i ulykka.
I november i fjor kravde Bane Nor millionerstatning frå OnRail AS. Bane Nor meinte ulykka på Arna stasjon i 2024 totalt har kosta dei 28.342.137,82 kroner.
Den 2. juli i år sende Bane Nor søksmålsvarsel til OnRail og deira forsikringsselskap, via Crawford & Company Norway AS.
– Vi tar det eigentleg med ro, fordi OnRail har ei lovbestemt ansvarsforsikring, som dekker opp til ein halv milliard kroner, seier dagleg leiar Henning Aandal i OnRail.
Lokførar godtok bot
I ein rapport slo Havarikommisjonen fast at den direkte årsaka til ulykka var at både lokføraren i godstoget og terminalarbeidaren gløymde å opne ei kran.
Dette førte til at bremsene på vognene ikkje fungerte, og rapporten slår fast at den direkte årsaka til ulykka, var svært redusert bremsekraft.
I mai i år vart det kjent at den sikta lokføraren hadde godtatt ei bot på 30.000 kroner.
Etter dommen sa Aandal i OnRail at dei hadde gått gjennom sine rutinar og prosedyrar.
– Dei har vist seg å vere bra nok. Vi har likevel gjort nokon justeringar, men vi sagt at både opplæringa har vore god og at lokomotivet var nytt. OnRail som selskap har ikkje vore i søkelyset frå politiet, sa Aandal.
Ueinige i dokumentasjonen for kravet
I ein e-postutveksling NRK har fått innsyn i, kjem det fram at Bane Nor opplyste Crawford & Company Norway AS, som representerer OnRail AS, om varselet alt i slutten av juni i år.
Før dette har partane vore ueinige i om det økonomiske tapet til Bane Nor er «tilstrekkeleg sannsynleggjort».
Crawford & Company Norway AS skreiv at dei «synest det tvilsamt om Bane Nor vil bli i stand til å dokumentere store deler av sitt krav».
Dei meiner at Bane Nor og Onrail sitt forsikringsselskap er «meir tent med å komme fram til et omforent erstatningsbeløp, utan at ein går inn i alle detaljane i saka».
– Vi er kjent med at forsikringsselskapet motseier kravet til Bane Nor, seier Aandal.
– Dekkast
Aandal seier varselet om søksmål gjeld Bane Nor sitt «påståtte tap etter avsporinga i Arna».
– Viss det viser seg at OnRail som selskap er erstatningspliktig, så dekkast det av ansvarsforsikringa til OnRail.
Aandal seier at ifølge politiet har ikkje OnRail som selskap gjort noko feil.
– Viss lokomotivføraren er tilsett for å køyre OnRail sine tog, så ligg det vel eit ansvar der også?
– Det er det forsikringsselskapet og Bane Nor diskuterer no, men OnRail vil heldigvis ikkje bli sjølv ansvarleg økonomisk, ettersom det er forsikringsselskapet som vil betale ein eventuell erstatning, seier Aandal.