– Vi ville ha noko som skaper identitet.
Det seier Torstein Hamran, styremedlem i supportergruppa Oljeberget, om det spesiallaga hornet dei tar med seg til USA.
Då det blei klart at Noreg var tilbake i det gjævaste fotballselskapet etter 28 år i bakgarden i fotballen, hadde supportergruppa eit drodlemøte med NFF.
Kva kunne fotballforbundet og Oljeberget finne på saman under temaet «den moderne vikingen»?
Dei kom fram til mange ting. Éin av dei er at supporterane skal «ro» på tribunen. Og kva skal sette i gang roinga?
Dette:
Ikkje som ein vuvuzela
Hornet er spesiallaga av ekte oksehorn og messing.
– Det finst vel berre to personar i heile Noreg som lagar sånne typar instrument, seier Erik Helmersen i NFF.
Og det var blåsemakar Karstein Grønnesby som fekk oppdraget. Han set pris på at NFF gjorde dette grundig.
– Dette er ekte vare, rota i verkelegheita og i historia. På mange måtar tar det blåseinstrumentet tilbake til originalfunksjonen: organisering og skremming, seier Grønnesby.
I tillegg til ein proff blåsemakar har også andre blitt kopla på for at ting skal bli historisk rett.
– Vikingar på tokt blåste i horn. Vi har vore på Vikingtidsmuseet og snakka med folk der for å få det historisk korrekt. Dessutan er det ein naturleg link der med VM i USA og vikingar på tokt i Nord-Amerika, forklarer Helmersen.
Hornet er vanskeleg å spele på, omtrent som ein trompet. Det vil først og fremst bli brukt som eit signal for å samle supporterane til felles rop og rørsle, som roinga.
– Hornet skal ikkje fungere som ein slitsam, kontinuerleg lyd. Det er ikkje ein vuvuzela, den skal berre brukast for å sette i gang enkelte rop. Den blir brukt med måtehald, seier Hamran i Oljeberget.
Han fortel at Oljeberget sine to forsongarar er tenkte som brukarar, og begge har fått høve til å øve med hornet før VM.
Fem horn er produserte. NFF vil ikkje avsløre prisen.
Supporter-cruise i New York
Fotballforbundet anslår at mellom 7000 og 10.000 norske supporterar drar til VM for å heie på Noreg.
Dei kjem ikkje til å kjede seg, seier leiar for Oljeberget, Sebastian Husvik.
– Det blir flest kule arrangement og treffpunkt, og garantert sinnssjuk stemning. Vi skal ha supportercruise og greier, 600 nordmenn på ein båt utanfor New York.
– Skal de ro, eller?
– Det hadde vore gøy om vi måtte ro, men eg tippar båten har motor.
Oljeberget kjem ikkje til å ha noko offisielt supporterarrangement heime i Noreg. Det betyr sjølvsagt ikkje at stemninga blir noko dårlegare her enn i USA, seier Husvik.
– Det ordnar seg sjølv. Det er berre å lese lokalavisa di, det er eufori og arrangement over heile landet.
– No håpar vi heile Noreg skal ro, frå Lindesnes til Nordkapp, med dei som sit på tribunen i USA!
Har ikkje returbillett
Tomas Tuen er éin av dei som skal vere på tribunen.
Han er klar for å ro, og skal sjå alle Noregs tre gruppespelkampar. Minst.
– Eg har ikkje bestilt returbillett, for å seie det sånn. Eg er rimeleg klar.
Tua var fire år sist Noreg spelte fotball-VM. Det hugsar han ikkje så mykje av. No vil han få mest mogleg ut av opplevinga, sjølv om det kostar.
– Pengar er ein bagatell, det er ikkje kvart år det er VM.
– Blir det poteter resten av året no, då?
– Hehe, ja, kanskje. Det er ei prioriteringssak!
Oljeberg-leiar Sebastian Husvik sjølv blir derimot heime i Fredrikstad under heile VM. Grunnen?
– Jentene i familien ville heller til «Granka» i år. Og eg skal gifte meg. FOMOen blir brutal, men eg har blitt lova fotball-EM 2028.