På slottsplassen går Elisabeth Lauritzen og Anne Mette Volden med kvar si rose klare for å bidra til blomsterhavet.
Men det er spesielt éin annan dei vil gi merksemd til denne laurdagen.
– Vi har jo vakse opp med kjærleikshistoria deira, altså for ei sterk historie, seier Lauritzen.
Laurdag er det 58 år sidan kong Harald og dronning Sonja gifta seg, men i år er dronninga aleine på bryllaupsdagen for første gong.
– Eg får heilt gåsehud og tårar i auga av det her. Og tenker på den talen kongen hadde for ei tid tilbake, det med at ein skal få lov til å elske kven ein vil, seier Volden.
Ei kvinne av folket
Kong Harald venta ni år på å få lov til å gifte seg med sin Sonja, som var ei kvinne av folket.
– I dag er det 58 år sidan dei gifta seg. Gratulerer med bryllaupsdagen, kjære mamma, sa ein rørt kong Haakon i den første talen sin som konge.
Tårane finn vegen til Volden og Lauritzen før dei seier saman:
– Vi får frysningar av at det er bryllaupsdagen deira i dag. Vi finn ikkje ord, eigentleg.
I den augneblinken bestemmer dei seg.
Dei skal legge blomstrane sine på statuen av dronning Sonja i Slottsparken heller, som ei ekstra støtte til den tidlegare dronninga.
– Vi tenker veldig mykje på deg, Sonja. Vi håper at du blir tatt vare på. All varme til deg, helser dei.
Må ta vare på minna
Også familien Moen-Larsen har tatt turen for å vise støtta si.
Åtte år gamle Kristoffer er knapp i orda, men står klar med ein stor blomsterbukett.
– Eg trur når ein står i det, når det stormar som verst, er det vanskeleg å sjå for seg at livet ein gong blir lettare, seier mamma Natalia om sorga som dronning Sonja må bere på.
Dottera Aleksandra teiknar ein tåre i ansiktet, mens mamma legg ned blomstrane.
– Samtidig vil ho ha alle desse minna frå åra ho har hatt med Harald. Dei har jo gjort så utruleg mykje saman og vore så mange stader. Så eg trur minna må varme ho no.
Tenner lys for Sonja
Men det er ikkje berre slottsplassen som er fylt opp av bukettar. Utanfor Bygdø Kongsgård ligg blomstrar, helsingar og ei lyslenke nedover vegen.
Og der sit Karina Hoffgård, som bur i nabolaget.
– Det er vemodig. Eg tenker på ho, seier Hoffgård.
Ho har gått gjennom alle lyslyktene og tent dei for dronning Sonja.
– Det er til ho. Eg bidrar der eg kan, seier ho og tenner det siste lyset.