Rådhusplassen i Oslo er farga gul. Nokon held solsikker og gule blomar i henda.
Fleire hundre menneske har kledd seg i favorittfarga til Tamima Nibras Juhar for å heidre 34-åringen.
To av appellantane var nevøane til Tamima. Gutane på 16 og 17 år skildra ei tante full av kjærleik og varme.
– Det er ein sorg som er så tung å bere at det nesten er umogleg å skildre med ord, sa Bilal frå scena.
Han fortel at det som skjedde ikkje berre har tatt frå dei tanta.
– Det har også gjort oss redde på ein måte vi aldri trudde vi skulle bli, seier 17-åringen.
– Når rasismen går frå å vere noko ein les eller høyrer om på nyheitene, til å ramme din eigen familie, forandrar det noko inni deg. Ein forstår at tryggleik ikkje kan takast for gitt, fortset broren, Isak.
Brørne uttrykker takksemd for det store oppmøtet.
– Vi har følt at folket har ryggen vår. Det er viktig å stå saman om å seie at det som skjedde med ho aldri skal bli gløymd. Det er ein kamp vi alle må kjempe kvar einaste dag, seier Isak.
– Vi elskar deg tante, du skal aldri bli gløymd, avslutar han.
Drepen på jobb
I dag er det nøyaktig eitt år sidan 34 år gamle Tamima Nibras Juhar vart drepen på jobb på eit butreningstiltak på Kampen i Oslo.
Drapsmannen var 18 år gamle Djordje Wilms, som var bebuar på tiltaket.
Han stadfesta at han at han drap Tamima fordi ho var muslim, og at han mellom anna var inspirert av Anders Behring Breivik.
I juni vart han dømd til 19 års forvaring med minstetid på 12 år og 8 månadar.
Drapet vekte kraftige reaksjonar og fleire titals tusen møtte opp til rosetog for å minnest Tamima.
Også den gong kledd i gult.
Ber om permanent minnesmerke
Umar Ashraf er leiar i Antirasistisk Senter, som er arrangør av markeringa. Han skildrar drapet som eit ferskt sår.
– Der er viktig for oss å skape arenaer der folk kan sørge og kjenne på samhald og fellesskap.
Frå scena tok han til orde for eit permanent minnesmerke for Tamima.
– Eg er ein 85-er frå Holmlia, og er oppvaksen med Benjamin Hermansen friskt i minnet.
Han trur eit minnesmerke kan halde minnet i livet.
– Eg ønskjer, både for familien og for andre antirasistar, ein plass der ein kan minnest og halde minnet hennar levande i tida framover.
Kvinner ekstra utsett
– At ho var på jobb, på ein plass ho skulle vere trygg, det gjorde noko med folk. At ein faktisk ikkje er trygg nokon plassar.
Det seier Khansa Ali. Ho er leiar for Mira-senteret, som er ein møteplass for minoritetskvinner, og fortel at drapet skapte stor frykt hos deira brukarar.
– Vi har sett over lang tid at normaliseringa av rasisme og muslimhat har gjort at sårbare minoritetar blir meir utsett. Kvinner, fordi dei er i skjeringspunktet mellom kvinnehat og rasisme, er ekstra utsett.
– Tamima er eit bevis på akkurat det.
Ali seier at det er viktig for hennar organisasjon å delta, og at det betyr mykje å sjå at så mange har møtt opp.
– Det betyr at dette hatet ikkje har grobotn blant folket.