– Det er mindre is enn vi forventa, seier toktleiar Paul Dodd frå Norsk Polarinstitutt i ei pressemelding.
Toktet er ein del av Polhavet 2025, eit ti år langt forskingsprosjekt utført av 18 norske forskingsinstitusjonar med budsjett på opp til 2 milliardar kroner.
Det er Noregs største forskingssatsing i Arktis nokosinne.
Prosjektet har som mål å forske på korleis klimaendringane påverkar Polhavet og konsekvensane av dette på sikkerheit, miljø, økosystem og næringsutvikling.
Dodd kallar reisa overraskande lett
– Vi kunne for det meste køyre i ope farvatn rundt isflaka. Vi brøyt nesten ikkje is i det heile, held han fram.
FF Kronprins Haakon var i området rundt Nordpolen i eit døgn. Forskarane om bord tok prøver av isen og det som lever på og under isen. Dei brukte fleire nye typar spesialutstyr, mellom anna eit kamera som kan ta bilde av plankton.
– Då kan vi sjå korleis næringskjedene i isen endrar seg når istypen vert annleis og temperaturane stig, seier Dodd.
Etter å ha segla over toppen av verda, sette FF Kronprins Haakon kursen vestover i retning Canada. Dei vil då reise lenger vest enn noko anna norsk forskingstokt av denne typen har gjort.
Toktet starta 23. juli frå Longyearbyen, og skal vare i 50 dagar.
– Det var langt mindre is enn ein skulle forvente, seier direktør i Norsk Polarinstitutt, Camilla Brekke. Klimaendringane og temperaturaukinga går raskare i nord enn mange andre stadar. Det gjer at isen i Polhavet svekkast og krympar.
– Så isen blir rett og slett tynnare, og det blir mindre av den.
Og dette gjorde altså at toktet som skulle ha kome fram denne veka kom fram allereie på fredag
– Samtidig så er det jo sjøis og økosystema der som vi forskar på. Så da er det jo interessant å sjå på istypane og isklassene, om dei endrar seg i takt med at klimaendringane trer fram, seier Brekke.
I mange år var det mykje is, og det var vanskeleg å komme seg fram i Polhavet.
– No ser vi at det blir meir og meir ope, og ein lengre sesong, der man kan flytte seg enklare, seier Brekke.