For første gong skal kremen av norske kjendisar møtast i ein julespesial av «Bakemesterskapet».
Men kan dei bake? Eller får dei seg ein juleknekk?
– Altså, herre min hatt. Eg trudde dette var fjase-TV, men så måtte vi prøvebake heime først, og eg tenkte: «Hæ? Så seriøst?».
Det seier Tiril Sjåstad Christiansen, som legg til at ho elskar å konkurrere.
– Så drit i julekosen, eg skal vinne!
Vinnarskallar kan feile
Som tidlegare toppidrettsutøvar har ho lært at det berre er ein ting som gjeld: Å vinne.
Den rå innstillinga kan hjelpe henne til siger, men det er ikkje nok i seg sjølv, seier idrettspsykolog:
– Motivasjon for å vinne kan ikkje kompensere for gode ferdigheiter! Sterkt ønske om å vinne kan komme i vegen for godt nok fokus på prosessen. Dei aller beste idrettsutøvarane klarar å sjonglere dette på ein klok måte.
Det forklarar Anne Marte Pensgaard, professor i idrettspsykologi ved Noregs idrettshøgskule.
Ho var også med på å skrive boka «Norske vinnerskaller».
Tøffe konkurrentar
Vegen til kaketoppen kan altså bli både sirupsseig og svidd for den tidlegare freestyle-vinnaren.
For konkurrentane er klare til kamp:
– Dei eg frykta, var samtlege damer. Pluss Andreas Wahl, eg tenkte han sikkert kunne eksperimentere og gjere fancy ting.
Samtidig innrømmer ho kven ho ikkje frykta: Håvard Lilleheie og Magnus Devold.
Dommarane, derimot...
– Det var heilt forferdeleg å bli bedømt av Marthe og André! Eg trudde dette skulle bli lågterskel og god stemning. Men det var veldig stas å få skryt, blei litt kry då, seier Sjåstad Christiansen.
Perfekt kombinasjon
Artisten Jenny Jenssen hadde ein annan motivasjon til å gjere det godt:
– Eg elskar å bake, og eg elskar jula – betre kombinasjon finst ikkje! Derfor vil eg berre vere med lengst mogleg, seier juleentusiasten.
Hennar beste minne er bygginga av peparkakehus, og samhaldet blant deltakarane.
– Sjølv om vi konkurrerte, så hjelpte vi kvarandre.
Dei intense dagane i baketeltet har gitt fire episodar fullstappa med hysteri, lykke, frustrasjon og julefryd.
Premieredatoen blir 28. november.
Då ligg alle episodane ute på NRK TV – kos deg!
