Nokre steinkast frå huset til Aud Bente Forbord ligg eit stort cruiseskip med motoren i gang.
I området vrimlar tusenvis av tyske turistar.
– Det har hendt at eg har reist vekk. Belastninga blir for stor, seier Forbord.
Ho bur i Måløy, ein liten by ytst i Nordfjord. Vel 3000 personar bur her.
Denne sesongen kjem over 60 skip til Måløy.
Den konstante duren frå skipa gjer det slitsamt for Forbord å vere utandørs. I tillegg er det tuting frå skipa og musikk frå kaia.
Mange turistar kjem tett på eigedommen for å ta bilde av ein bekk. Dei store skipa blokkerer òg utsikta frå huset, der ho har budd sidan 1980.
– Det går ut over livskvaliteten min, seier Forbord.
Pengar i kassa
Cruisetrafikken til Noreg er meir enn dobla på 10 år. Små stader som Måløy står for mykje av veksten.
Byen har tradisjonelt vore ein fiske- og industriby. Den første cruisebåten la til kai i 2022.
– Eg har stor forståing for at folk som bur i tilknyting til næringsområdet av og til kan føle at det er litt i meste laget, seier Frank Willy Djuvik.
Djuvik er dagleg leiar i Måløy Adventure og primus motor i turistbransjen. Han er òg varaordførar for Frp i kommunen.
Han meiner likevel cruisenæringa har vore positiv for byen. For reiselivet og handelsstanden peikar pilane oppover.
– Cruise har blitt heilt avgjerande for å oppretthalde mange av tilboda som alle nyt godt av, som restaurantar og butikkar, seier Frank Willy Djuvik.
Hundre på jobb
Denne dagen jobbar nær hundre personar med å ta imot passasjerane.
Mellom anna er Josef Maximilian Lien Husevåg sjåfør og guide. Han fekk sponsa minibuss-lappen før årets sesong.
– Det blir lagt igjen mykje pengar i kassa. Eg trur folk har innsett at vi bør spele kvarandre gode, for dette er ikkje noko som kjem til å stoppe med det første, seier han.
Nordfjord hamn jobbar stadig med å forbetre handteringa av turiststraumen, men meiner cruise har vore positivt for Måløy, ifølge assisterande hamnedirektør, Sølve Oldeide.
Dei har utført lydmålingar i nabolaget, og seier støynivået ikkje er ulovleg.
Inga maksgrense
Måløy har inga grense for kor mange turistar som kan komme på ein dag. Til dømes har Bergen og Stavanger eit tak på 8000 passasjerar dagleg.
Det må på plass i Måløy, meiner Annette Stene Seljen. Ho er leiar for SV i kommunen.
– Eit tak må på plass. Eg skal ikkje vere den som skal definere det. Mitt poeng er at næringa sjølv ikkje skal få definere det. Det skal politikarane gjere, seier ho.
Vurderer å flytte
Måløy ligg ytst i Nordfjord. Fjorden har også store cruisehamner på Nordfjordeid og i Olden.
På dei travlaste dagane kjem fleire cruiseturistar enn regionen toler, ifølge ein rapport frå 2024.
Men ingen stader har innført maksgrense, og dei to hamneselskapa langs fjorden snakkar ikkje saman om når skipa skal komme.
Aud Bente Forbord synest det er bra at folk tener pengar, og ho har ikkje noko imot turistar i seg sjølve. Det er mengda turistar og frekvensen av båtar ho reagerer på.
– Eg har vurdert om eg orkar å bu her. Vi får sjå korleis utviklinga blir.