Vålerenga går kraftig til verks mot eigne supporterar etter scenene som gjekk føre seg på tribunen under oppgjeret mot Lillestrøm tidlegare i haust.
På Åråsen blei rundt 140 sete øydelagde, sanitæranlegg ramponert og vegger tagga ned. Frå borteseksjonen blei det også kasta bluss, sperregjerde og delar av stolsete inn på banen.
Det likar Oslo-klubben svært dårleg.
Sikkerheitssjefen lettar no på sløret overfor NRK om korleis dei har handtert saka i etterkant. Dei første sanksjonane blei sett i verk inn mot oppgjeret mot KFUM Oslo 12. oktober.
Og fleire supporterar kan bli utestengde, for det er framleis saker til behandling.
– Av dei vedtaka som er gjort, er det mellom 5 til 50 kampars utestenging, avhengig av kva kvar enkelt har gjort, seier sikkerheitssjef Ronnie Bergheim til NRK.
Han listar opp hærverk, truande oppførsel og brot på regelverket innanfor pyroteknikk som handlingar dei har slått ned på.
– Kor mange supporterar har fått slike sanksjonar?
– Vi pleier ikkje å gå ut med tal, men det er mellom 5–10 personar. Og vi forventar at det blir fleire, varslar Bergeim.
«Fridom for dei utestengde»
Vålerenga fekk seg ein etterlengta opptur med 1-0-siger borte mot Bodø/Glimt laurdag kveld.
Der hadde ikkje alle supporterane lov til å vere til stades.
På tribunen kunne ein sjå Ultras-grupperinga Ikaros med eit banner påskrive «Diffidati con noi», som betyr fridom for dei utestengde.
Teksten var også plassert på capo-tårnet under heimekampen mot Brann for ei veke sidan.
Ultragrupperinga uttaler seg vanlegvis ikkje til pressa, men har fått høve til å klargjere synet sitt overfor NRK.
I ei melding på Instagram, skriv dei blant anna følgande:
«Det er ikkje alt som skjedde på Åråsen vi kan stå inne for. Resultatet har den siste tida vore at vi har mista fleire av den harde kjernen vår til sanksjonar frå klubben. Nokon har fått kort straff, nokon litt lenger, mens andre har fått så det svir på pungen og vel så det».
Banket opp på perrongen: – Nå dør jeg
Inntil 60 kampar
Vålerenga har eit strengt sanksjonsreglement dei kan nytte mot eigne supporterar i slike saker.
I sanksjonsreglementet til klubben står det at blant anna vald, grov sjikane og ulovleg bruk av pyroteknikk som medfører alvorleg skade på materiell eller personar, kan straffast med inntil 60 kampars utestenging.
Det er ikkje uvanleg at Oslo-klubben handhevar reglementet sitt på denne måten. Blant anna blei to personar utestengde for rasisme og vald etter bortekampen mot Moss, hausten 2024.
Det verkar også som supporterane er innforståtte med dette:
«Samtidig er det også sånn at om ein bryt sanksjonsreglementet, så kan ein forvente ei form for straff», skriv Ikaros sjølv.
Opplever at sanksjonane blir respekterte
Sikkerheitssjef Bergheim har forståing for at det dukkar opp banner på tribunen i samband med ei slik sak, og ser på det som heilt uproblematisk.
– Det er sentralt i kulturen deira som ultras, samtidig opplever vi at dei forstår kvifor vi sanksjonerer, i tillegg til at sanksjonane blir respekterte i miljøa, seier Bergheim.
Ikaros avsluttar uttalen sin med ein lovnad til dei sanksjonerte:
«Til dei utestengde: Offera dykkar vil aldri bli gløymde, og de vil vere ved vår side i «spirit» til den dagen de er tilbake på tribunen. Alltid med oss!».
Frivillige jobber på spreng etter hærverket: – Trodde ikke det skulle være så fælt