Alt som blir sagt om kong Harald, gjeld og for dronning Sonja.
Haraldstida var òg Sonjatida.
Heilt sidan dei kjempa for å få kvarandre, er det dei to som saman har gjeve form og farge til kapittelet som no vert lukka.
Heldig er den som har ein makker gjennom eit heilt liv, og det hadde kong Harald.
Dronning Sonja gav han både motstand og mot. Kongen har sjølv forklart at det var Sonja som transformerte han frå ein forknytt tronarving til ein trygg folkekonge.
Heldig er den som slepp å vere einsam majestet.
Og for ei stilig dame dronning Sonja er, og alltid har vore!
Anten det har vore hattar, drakter, gallaantrekk, anorakk eller fjellstøvlar, har ho bore det med den same uanstrengde elegansen.
Heldig er den nasjonen som blir representert av ei slik dronning.
Heilt sidan ho trådde fram som ung og borgarleg kronprinsesse, har dronninga brote barrierar.
Det vart opp til henne å teikne opp det moderne norske dronningoppdraget og gje embetet eit nytt og aktivt innhald.
Gjennom sine fjellturar og sitt engasjement for biletkunst og handverk, forma ho rolla til å bli eit levande symbol på norsk identitet og tradisjon.
Hans majestet kong Haakons første tale til nasjonen var ei oppvisning i kontroll.
Men det er ein sprekk i alt, og då han gratulerte mora med bryllaupsdagen, brast stemma.
Klumpen i halsen var ikkje berre ein hyllest til eit ekteskap, men ei direkte anerkjenning av at foreldra var eit tospann – og at summen kan bli større.
Heldig er den sonen som har slike foreldre.
Kong Harald var aldri redd for å seie kor mykje han lente seg på kona si. Det var inga svakheit, men klokskap og moderne leiarskap.
Alt kongen var for Noreg, er òg hennar forteneste. Når eit historisk kapittel no er over, står arven etter dei begge att – felles og heil.
Heldig er den nasjonen som har hatt eit slikt kongepar.
Heldig er den nasjonen som har ei slik kongemor.
