Søndag ettermiddag var Lars André Bigton eins ærend opp til familiehytta på Emblemsfjellet. I sekken låg eit nyinnkjøpt viltkamera. Planen er å kjøpe inn fleire.
– Hendingane dei siste dagane med brann på fjellet gjer at vi er bekymra, seier han og legg til:
– At hytter som har stått her i 100, 200, 300 år ikkje får stå i fred, er jo heilt forferdeleg.
Torsdag kveld og natt til fredag brann to hytter ned til grunnen, og det er mistanke om at brannane er påsette.
Brannane skjer berre kilometer frå Sulafjellet, der det har vore seks uoppklarte hyttebrannar dei siste åra.
No fryktar fleire at bølgja av brannar har spreidd seg til nabofjellet.
– Det er forferdeleg, det som skjer. Det er tragisk, seier Bigton.
Bigton seier han har snakka med fleire andre dei siste dagane som gjer som han. Håpet er at overvakingskamera skal skremme vekk ein eventuell ubedd gjest.
Hentar ned ting frå hytta
Hytta til familien Bigton er godt kjent blant turgåarar i området og er nær 100 år gamal.
Søndag ettermiddag henta familien hyttebøker og andre ting som dei vil sikre for ettertida, i frykt for at det skal brenne opp.
– Vi er bekymra for hytta vår. Vi er redde for at det skal bli tent på her òg. Dersom det er nokon som har sett fyr på dei to andre, så kan jo denne personen halde fram, seier Helene Bigton.
Hytteeigar Trond-Petter Kaasbøll er også uroleg for det som har skjedd, og vurderer å sette opp overvakingskamera, slik som Bigton-familien.
Han seier at han ikkje er redd, men meiner det er viktig å finne den moglege gjerningspersonen før fleire hytter går opp i flammar.
Framleis ingen mistenkte
Politiet seier dei foreløpig ikkje har nokon mistenkte i saka, og vil framleis ha tips frå publikum.
Operasjonsleiar Jan Arild Austnes hos Møre og Romsdal politidistrikt seier dei jobbar breitt.
– Vi jobbar vidare, og har fokus på desse brannane for å finne ut kven som har gjort det og kva som har skjedd.
Han ønsker ikkje å kommentere opplysningane om at fleire hytteeigarar har sett opp kamera.
– Det er veldig skremmande
Politiet har heller aldri funne ut kven som sto bak brannane på nabofjellet i Sula.
Olav Hoff opplevde å miste ei hytte og eit anneks i brannane der. No er det hytter på nabofjellet som brenn.
Hoff fryktar at det kan vere same gjerningspersonar som står bak dei nye brannane.
– Det er veldig skremmande. Ein kan jo ikkje vite sikkert. Men eg tenkjer at det ikkje kan vere så mange galningar som driv på med dette.
Hoff seier at hyttebrannane på Sulafjellet har ført til at mange kjenner seg utrygge.
Sjølv sjekkar han kvar morgonen kameraet som han har montert på den nye hytta. Han vite om hytta framleis står.
– Hytte skulle vere ein plass du kunne gå og slappe av og ikkje tenkje på så mykje anna enn det som er kjekt. Men dette har skapt ei kjensle av utryggleik og frykt.
Håper det tek slutt
No håper hytteeigarane både på Sulafjellet og Emblemsfjellet at politiet klarer å løyse gåta, og at det blir slutt på dei uoppklarte brannane.
– Det beste som kan skje er at den personen som eventuelt tenner på blir tatt, slik at det blir stoppa, seier Solgunn Osnes.
