– Min klient erkjenner ikkje straffskuld, og vil etter planen bli avhøyrt i kveld, opplyser forsvarar til den sikta, Darija Jamina, til NRK måndag ettermiddag.
Det var like etter klokka 01 natt til måndag at politiet blei varsla om at ein mann i 60-åra var funnen hardt skadd utandørs i eit bustadområde.
Det var eit tilfeldig vitne som fann mannen, som hadde skadar etter mogleg vald og klede som lukta bensin.
No er ein mann i 20-åra pågripen og er førebels sikta for drapsforsøk på mannen i 60-åra, opplyser politiet.
Årsaka til siktinga er skadane som den fornærma mannen har.
Han er innlagt på sjukehus, men tilstanden hans er ikkje kjend.
Kartleggar relasjon
Politiadvokat Katrine Engelsgjerd Eikestad seier dei kartleggar kva relasjon det har vore mellom den sikta og den fornærma mannen.
– Dette er eitt av dei temaa me etterforskar no.
– Har dei to involverte nokon førhistorie med politiet?
– Det kan eg dessverre ikkje kommentere.
Mannen i 20-åra blei pågripen heime hos seg sjølv.
Politiet vil ikkje utelukke at det er fleire involverte i hendinga.
Dei skriv i ei pressemelding at dei etterforskar saka breitt, og planlegg avhøyr av den sikta mannen i dag.
Avhøyrer vitne
Det er gjort innleiande undersøkingar på funnstaden og heime hjå den fornærma mannen.
Politiet er i gang med å avhøyre vitne og kriminaltekniske undersøkingar i området ved funnstaden.
Dei skal også ta stilling til om den sikta mannen skal framstillast for varetektsfengsling.
Politiet skriv at dei er interessert i tips om saka på telefon 02800.
