Marius Borg Høiby vert ikkje lauslaten frå varetekt.
Det kjem fram i ei fersk avgjerd frå Borgarting lagmannsrett.
– Lagmannsretten har kommet til at det fortsatt foreligger en sterk grad av sannsynlighet for at Høiby vil begå nye straffbare handlinger dersom han løslates, står det mellom anna.
Det meinte ikkje Oslo tingrett, som tidlegare denne veka landa på at Høiby kunne sleppast fri. Dei meinte mellom anna at det ikkje var sannsynleg med nye lovbrot.
– Me er veldig, veldig skuffa og finn avgjerda nesten uforståeleg, seier forsvarar Ellen Holager Andenæs til NRK.
Ho opplyser at dei likevel har landa på å ikkje anka til Høgsterett.
Høiby bad om å verta lauslaten for å kunna vera saman med mora, kronprinsesse Mette-Marit, som er alvorleg sjuk.
Argumenterte med familien
I tilsvaret til anken stod det at Høiby veit han risikerar å verta arrestert og fengsla igjen viss han gjer noko straffbart igjen, og at det ville vera eit stort svik overfor familien hans.
Men det er ikkje nok, meiner lagmannsretten.
– Høiby har hele tiden vært kjent med konsekvensene av å bryte et besøksforbud, uten at dette har hindret ham i å gjøre nettopp det. Han må også ha forstått at han har påført familien en belastning med disse lovbruddene, hans omfattende rusbruk, og ikke minst den omfattende medieoppmerksomheten dette har medført for ham og kongefamilien.
– Til tross for dette har han begått nye lovbrudd, heiter det i avgjerda.
Politiadvokaten: – Framleis fengsling er nødvendig
– Eg trur me som alle andre ikkje har vanskeleg å forstå at situasjonen er belastande, seier politiadvokat Hilde Hermansrud Strand.
Ho seier påtalemakta er fornøgd med dommen. Domarane har ikkje trur ikkje på påstandane frå Høiby om at han vil klara å unngå nye lovbrot.
– Siktas uttalese om avståing frå rus og andre handlingar, særleg mot den såkalla Frogner-kvinna ligg til grunn. Det er me fornøgd med.
– Ikkje eit spørsmål om vilje
I avgjerda står det også at retten ikkje er i tvil om at Høiby ikkje vil påføra mora meir vanskelegheiter.
Dei meiner likevel ikkje at sjukdommen til kronprinsessa gjer det mindre sannsynleg at Høiby vil ta kontakt med dei fornærma i saka igjen og mogleg gjera nye straffbare handlingar.
– Slik lagmannsretten ser det er dette ikke et spørsmål om vilje, men et spørsmål om evne, livsmønster og risikofaktorer, står det vidare.
Lagmannsretten meiner heller ikkje at situasjonen til Høiby er vanskelegare enn for andre innsette som har sjuke familiemedlemmar.
Viktigast med god behandling av saka
Heidi Reisvang er bistandsadvokat for tre av dei fornærma kvinnene i saka.
– Me noterer oss avgjerda frå lagmannsretten. Når det er sagt, har ikkje våre klientar noko spesiell haldning til om han sit i varetekt eller ikkje. For dei er det viktigaste at straffesaka vert behandla på ein god og grundig måte, og at han får den hjelpa han treng, seier ho til NRK.
Mette Yvonne Larsen er bistandsadvokat for den såkalla Frogner-kvinna.
Ho seier til NRK at ho ikkje har noko kommentar til saka.
– Ein hard dom
– Det er ein hard dom og ei brutal tilnærming, seier advokat Brynjar Meling.
– Dette er eit ganske sviande nederlag for Høiby kontra den han opplevde i tingretten, seier Meling og viser til at Oslo tingrett ville sleppa han fri frå varetekt.
I avgjerda kjem det fram at Høiby har vorte framstilt ti gonger sidan han vart varetektsfengsla 2. februar.
Ei framstilling i dette tilfellet betyr at han får koma ut av fengselet i ein kort periode, men i følge med ein fengselsbetjent.
– Viss ein er opptatt av om han vert mildare eller strengare behandla enn andre, må eg seia at eg har aldri vore med på at nokon får framstilling så mange gonger. Retten viser her at det er gode moglegheiter for framstilling, seier Meling.
Vil ha tid med mora
Fredag i førre veke vart det kjent at lungesjukdommen til kronprinsessa har utvikla seg til det verre og at ho er sett på venteliste for transplantasjon.
Høiby bad om å verta lauslaten frå varetekt på grunn av helsetilstanden hennar.
Men politiet ville ikkje sleppa han fri. Dermed enda saka opp i retten.
– Eg har det ekstremt tøft. Eg synest det er veldig vanskeleg, sa Høiby då han møtte i retten.
Oslo tingrett landa på å sleppa fri Høiby – men aktor anka på staden.
Saka gjekk difor vidare til Borgarting lagmannsrett, som altså var ueinig med tingretten.
Høiby har sete i varetekt sidan februar. Då vart han pågripen for nye lovbrot helga før rettssaka mot han starta.
Han nektar for dei fleste skuldingane, men har innrømt heilt eller delvis skuld på enkelte punkt.
Dommen er venta måndag.
I denne saka kan du lesa meir om kva han er skulda for: