Førre veke blei det kjent at miljøstiftelsen Bellona har slite økonomisk i fleire år.
Rørsla varsla at dei trong 8 millionar kroner innan gårsdagen for å kunne halde fram.
Sidan innsamlingsaksjonen byrja har Bellona samla inn 13 millionar kroner, presenterte leiinga i Bellona under ein pressekonferanse.
– Vi er takknemlege og audmjuke. Det er med stor takksemd og audmjuke at vi får fortsette miljøkampen, seier grunnleggar og styreleiar Frederic Hauge til NRK.
Sjølv om Bellona får halde fram, vil dei måtte nedbemanne organisasjonen.
– Vi er framleis nøydd til å redusere utgiftene våre framover. Det betyr at vi må fortsette ein nedbemanningsprosess som vi allereie er i gang med, slik at vi sikrar ein trygg drift og kan leve vidare og jobbe for miljøet, seier dagleg leiar Sveinung Rotevatn.
Held deg oppdatert på klima og miljø her:
Takksam Hauge
Stiftelsen gjennomførte eit styremøte i måndag, då ville ikkje Hauge kommentere møtet. No er tonen ein annan.
– Vi håpar at vi no skal opprette ein solid plattform, seier han.
– Eg har lyst til å takke dei tilsette. For ein gjeng, den siste veka! Eg vil takke styret. Dei har stått på som berre det, legg han til.
Hauge vedgår at det har vore«nokon tunge dagar», men at dei tilsette og støttespelarar har vore «grunnfjellet» for at Bellona framleis står.
Hauge takkar også den nytilsette Bellona-leiaren, Rotevatn.
– Så har eg lyst til å takke Sveinung. Han kom inn her og trudde at ... eg veit ikkje kva han trudde, men slik blei det ikkje, seier Hauge til latter frå sidemannen Sveinung Rotevatn.
Rotevatn understrekar at nokon liknande ikkje skal skje igjen, og at dei skal forvalte tilliten dei no har fått.
Les meir om Bellona sine økonomiske utfordringar her:
– Vi merker at klima og miljø ikke er øverst på dagsordenen lenger
– Har heldigvis lukkast
Rotevatn og Hauge fekk spørsmål frå salen om kvifor det gjekk gale no.
– Det har vore små marginar i drifta over tid. Det går bra heilt til det ikkje går bra. Så var utfordringa no i mai at vi fekk ein umiddelbar likviditetsskvis på grunn av inntekter som vart utsette eller fall bort, svarar Rotevatn.
Utan ein buffer var ikkje organisasjonen i stand til å handsame dei løpande forpliktingane sine, ifølge Rotevatn.
– Då har du i realiteten to val: melde oppbod eller gjere eit siste forsøk på å hente inn kapital, seier Rotevatn.
– Det var det Bellona valde å gjere, og vi har heldigvis lukkast, legg han til.
Dei 8 millionane Bellona bad om var nødvendig for å sikre framtidig drift, ifølge Rotevatn.
– Hadde vi fått noko mindre enn det, hadde eg ikkje anbefalt å drifte vidare.
– No fekk vi 13. Det gir oss eit nødvendig pusterom, men det blir framleis ein tøff haust for Bellona, seier dagleg leiar til NRK.
Hauge peikar på Bellona har fått på plass ein dagleg leiar med «kontroll og tillit», og at det er viktig for å sikre at noko liknande ikkje skjer igjen.
Store givarar
Heile 8 millionar kroner kom inn til Bellona i går frå store givarar.
Fleire av dei er anonyme, men Skipsreder Tom Wilhelmsens Stiftelse er opne om gåva si.
– Vi har så langt eg veit ikkje støtta Bellona tidlegare. Støtta inneber heller ikkje at vi nødvendigvis stiller oss bak alle standpunkta deira. Samtidig meiner vi det er viktig at det finst uavhengige aktørar som set miljø- og berekraftsspørsmål høgt på agendaen, og Bellona har over tid vore ei slik stemme.
Det skriv Thomas Wilhelmsen, styreformann i Tom Wilhelmsens Stiftelse.
Ifølgje Sveinung Rotevatn gav stiftinga åleine 3 millionar kroner til Bellona.
– Økonomisk krise
Stiftelsen oppretta ein Spleis i håp om å unngå konkurs og overleve til 40-årsdagen i sommar.
– Det er vår eigen feil og no ber vi om hjelp, sa Hauge til VG måndag.
Søndag hadde rørsla fått inn rundt 5 millionar kroner.
Alle tilsette har fått permitteringsvarsel. Bellona har rundt 40 tilsette i Noreg, og rundt 100 totalt.
Rotevatn stadfesta at stiftelsen har hatt anstrengd økonomi over fleire år.
– Vi er i økonomisk krise, men held motet oppe, sa han til NRK førre veke.
Allereie i 2023 slo ein revisor fast at eigenkapitalen var tapt. Det kom fram i årsrapportane for 2023 og 2024.
Hauge har stadfesta at problema har bygd seg opp sidan 2023 då stiftelsen fekk «betydelege utfordringar».