Moldespelaren som først blei dømt i tingretten for seksuell handling utan samtykke, no er frikjent i lagmannsretten.
Det var TV 2 som først meldte om saka.
Spelaren vart i desember 2025 tiltalt for seksuell handling utan samtykke. I tingretten vart han dømt til fengsel i seks månadar.
Mannen har heile tida nekta straffskuld.
– Min klient er letta over at dette marerittet no er ferdig, og at han kan konsentrere seg vidare om fotballen og laget sitt, seier forsvarar for mannen, John Christian Elden.
I ein epost klokka 16.40 utdjupar Elden kommentaren sin med å skrive at klienten hans heile tida har halde fast på at han har vore uskuldig, og at saka har vore ei stor belastning.
– No ser han fram til å legge saka bak seg, rette blikket framover og konsentrere seg fullt og heilt om fotballet, skriv Elden.
I dommen står det at på grunn av dei strenge beviskrava for straffskuld, så kan dei ikkje sjå vekk frå forklaringa til mannen.
Vurderer om han kan spele igjen
Molde FK skriv i ei pressemelding at dei tar dommen til etterretning
På bakgrunn av dommen vurderer Molde FK at han igjen vil vere tilgjengeleg for spel, sjølv om dommen foreløpig ikkje er rettskraftig.
– Vi har i dag mottatt informasjon om dommen i lagmannsretten. Dette har vore ein krevjande periode for alle involverte, og vi ønskjer å møte den med respekt og omtanke for alle som har vore råka, seier administrerande direktør Vegard Storvik.
Utover dette vil ikkje klubben gå ytterlegare inn i saka.
Ulik oppfatting
Både mannen og den fornærma kvinna var einige om at det har skjedd ei seksuell handling. Men dei var i retten ueinige om det skjedde frivillig eller ikkje.
Mannen meiner den seksuelle handlinga skjedde med kvinna sitt samtykke.
Medan kvinna meinte at ho gav uttrykk for at ho ikkje ville.
Bistandsadvokaten til kvinna som er den fornærma i saka, Egil Ax, seier han ikkje har noko kommentar til dommen.
Aktor i saka, Ander Skorpen Trøen, seier han må vurdere ei eventuell anke etter at han har lest dommen.
– Eg tek dommen til etterretning, og skal lese den grundig, seier han til NRK.
Politiet sikra ikkje meldingar
Aktor bad i utgangspunktet om seks månadar i fengsel i ankesaka i Frostating lagmannsrett. Medan forsvararen, John Christian Elden, meinte at fotballspelaren skulle bli frifunnen.
I dommen står det at retten også trur på forklaringa til den fornærma kvinna. Men at det er ei viss usikkerheit på kor klart og tydeleg ho skal ha uttrykt seg.
Det skal også ha blitt sendt ei melding frå ein venn av den no frifunne mannen. Der skal det ha stått at mannen skal ha gjort noko som ikkje skulle ha vore gjort.
Men her peiker retten på at dette ikkje er meldingar som er sikra av politiet. Og at ein ikkje kan vite når desse meldingane er skrive, eller om det faktisk er heile dialogen.
Dermed vart mannen einstemmig frifunnen.