– Wolfe har hatt ein litt tung start på sesongen i Hamburg, der laget har slite, og han har kanskje slite litt sjølv også. No får han litt ro og moglegheita til å få tilbake godfølelsen. Sjølv om han fekk ei litt betre oppleving i den siste kampen før han drog, så har det vore nokre stygge tap før det, forklarar landlagssjef Ståle Solbakken til TV 2.
Det er Benfica-spelar Fredrik Aursnes som startar på venstrebacken framfor Hamburgs David Møller Wolfe mot Danmark i Noregs første kamp i Nasjonsligaen, som NRK erfarte tidlegare onsdag.
– Veldig overraskande. Eg var heilt sikker på at Solbakken skulle bygge vidare på den forsvarsfiraren som har spelt mest saman det siste året, sa NRKs fotballekspert Kristoffer Løkberg tidlegare torsdag.
Møller Wolfe starta nemleg alle kampane på venstreback i VM, med unntak av kampen mot Frankrike, der Solbakken bytte nesten heile laget.
Mot Danmark stiller Noreg med dette laget i ein 4-3-3-formasjon:
Ørjan Håskjold Nyland – Julian Ryerson, Kristoffer Vassbakk Ajer, Torbjørn Heggem, Fredrik Aursnes – Martin Ødegaard (K), Sander Berge, Patrick Berg – Oscar Bobb, Erling Braut Haaland, Antonio Nusa
Avspark er klokka 20.45 på Ullevaal Stadion. Kampen sendast på TV 2 og kan følgjast på NRK Radio.
På onsdagens pressekonferanse varsla landslagssjefen få endringar på «VM-laget».
I onsdagens episode av NRK-podkasten «Bakrommet» avslørte Løkberg at Aursnes, som i utgangspunktet er midtbanespelar, hadde blitt drilla som venstreback på trening.
Likevel hadde han ikkje sett for seg at Aursnes skulle få sjansen frå start.
– Det er heilt sikkert ei taktisk vurdering ut frå korleis Solbakken ser for seg kampen. Aursnes tilbyr heilt andre kvalitetar enn Wolfe. Samtidig er det eit skikkeleg spark i ræva til Wolfe, og to strekar under svaret på at vi har eit venstrebackproblem, når det einaste reine alternativet vårt sit på benken, seier Løkberg.
– Fredrik Aursnes har i periodar spelt mykje back for Benfica. Så vi er ganske trygge på Fredrik. Han er ein rutinert spelar som kan bekle begge backposisjonane og eigentleg alle rollene på midtbanen, seier Solbakken til TV 2.
Kampen er den første av seks kampar i Nasjonsligaen denne hausten. Noreg skal spele heime og borte mot Danmark, Portugal og Wales.
Dersom ein blir topp to i gruppa går ein vidare til sluttspel i Nasjonsligaen neste år, som eitt av åtte lag.
Det er også viktig å bli blant dei tre beste i gruppa. Da er ein nemleg førsteseeda i trekkinga av EM-kvalifiseringa neste år, noko som betyr at ein vil vere i same pott som dei beste laga i Europa.
Da vil ein få ei enklare EM-kvalifiseringsgruppe og ein lettare veg til EM i 2028. Sisteplassen i gruppa risikerer dessutan å rykke ned til nest øvste nivå i Nasjonsligaen. Det vil få konsekvensar for Noregs vidare moglegheiter i turneringa, men også gjere det vanskelegare å komme til VM i 2030.