– Det var veldig mange svake involveringar jamt over, seier NRKs fotballekspert Andrine Hegerberg etter kampen mot Wales.
– Eg synest laget ser litt tungt og trått ut både med og utan ball, legg ekspertkollega Kristoffer Løkberg til.
Eit norsk kollektiv klarte ikkje å prestere i kampen der dei i utgangspunktet var store favorittar. Men heller ikkje Erling Braut Haaland var slik han brukar å vere.
– Haaland verka avskrudd frå første minutt. Han kom seg aldri på nivå, og fekk ein-to gylne sjansar med hovudet – men vi sat roleg på stolen. «Den her går ikkje i mål». Spruten kjem ikkje, ingen god dag for Haaland heller, seier Hegerberg.
– No er han heilt køyrd, og om han kan spele den kampen på søndag er eg veldig usikker på, seier NRKs ekspert Carl-Erik Torp.
– Heilt køyrd
Haaland spelte 90 minutt både mot Danmark og Portugal, og gjekk dermed inn i Wales-kampen med to fulle kampar den siste veka.
Carl-Erik Torp trur kampen mot walisarane kunne vore eit høve til å kvile Haaland.
– Ein tenkjer jo alltid at ein vil ha ein målskårar av hans kaliber på banen med dei 65 måla sine på 58 kampar. Samstundes handlar det om tøffe val og å klare å sjå dei gongene ein kanskje bør velje noko anna, seier NRKs fotballekspert Carl-Erik Torp.
– Denne kampen var kanskje ein type kamp der ein kunne kvilt han, sjølv om det blir etterpåklokskap og litt meiningslaust.
Ståle Solbakken vedgår overfor TV 2 at det var ein sliten Haaland ute på banen torsdag. Han meiner likevel det var rett å starte med han.
– Var det i retrospekt ei feil avgjerd å starte han?, spør NRK på pressekonferansen.
– Nei, det synest eg ikkje. Han fekk eit par sjansar der han i alle fall burde sett den eine, som han brukar å skåre på, seier Solbakken.
Torp fryktar det han trur kan bli ein krevjande situasjon for Noreg no, tre dagar før bortekampen mot Portugal.
– Eg sa det vel også inn mot pausen, at ein kanskje burde tatt av Haaland og kvilt han. Noreg hadde kanskje ikkje blitt nemneverdig dårlegare i denne kampen, men då hadde ein hatt ein meir utkvilt Haaland til kampen mot Portugal på søndag, seier Torp.
– Han såg sliten ut frå starten i dag, og eg har sjeldan sett han så mør undervegs i første omgang.
– Blir overskrifter
På spørsmål frå pressa om korleis han opplevde Haaland under kampen torsdag, og at fleire opplevde at han såg sliten ut, tek Martin Ødegaard kompisen i forsvar.
– Nei ... Du kan seie, skårar han på ein eller to av dei sjansane, så blir han hylla og «alt sånn». Han blir jo målt på å skåre mål, så då er det ofte slik det blir – at det blir overskrifter om det ikkje skjer, seier Ødegaard.
– Men han kjem til sjansar, og på ein annan dag skårar han kanskje to i dag.
– Tung og seig
Men det blei ikkje ein slik dag. Allereie til pause la fleire merke til haldninga. Kjetil Rekdal sa i VGTVs sending at Haaland ikkje hadde vore særleg delaktig.
– Eg synest han verka veldig sliten. Han verka tung og litt, skal ikkje seie at han er uinspirert, for det er feil ord å bruke, men han er ikkje med i kampen. Og det er Noreg heilt avhengig av, sa Rekdal etter den første omgangen.
Også han la til at Haaland fort kunne skåre eit par mål i andre omgang, utan at det skjedde denne gongen.
– Han verkar ikkje hundre prosent klar for kamp i utgangspunktet. Han ser litt tung ut, litt seig ut og litt forsiktig kanskje.