Etter å ha kjempa i 65 minutt i 1-2-tapet mot Portugal sa Haaland klart frå til benken at det var nok.
– Erling grov lenge. Eg synest han tok imot veldig mykje juling og var eit veldig godt oppspelpunkt, sa landslagssjef Ståle Solbakken til TV 2.
Juling og oppspelpunkt hadde han allereie fått og vore i tre gongar 90 minutt mot Danmark, Portugal og Wales i dei tre første nasjonsligakampane.
Oppgjeret søndag var kamp nummer fire på elleve dagar for spisskjempa, som uvanleg nok ikkje skåra i dei to siste.
Og kvilen blir kort. Allereie til helga ventar nye klubbkampar. For Haaland og Manchester City står Liverpool på bortebane på programmet søndag.
Mangla støtta
I VM i sommar, og dei siste par åra, har han gjerne kriga i tospann med 1,95 meter høge Alexander Sørloth – som har vikariert på høgrekanten med stor suksess. Sørloth måtte stå over samlinga med ein skade.
Blei sakna av Alexander Sørloth ekstra synleg denne landslagssamlinga? Det blei diskutert i siste episode av NRK-podkasten «Bakrommet».
Andrine Hegerberg mimrar tilbake til VM:
– Ja, det var kritikk mot Sørloth om at ein ønskte at han skulle vere på eit høgare nivå, men akkurat på det med å ta duellar, ta kampar og vere eit oppspelpunkt, der avlasta han Haaland veldig, meiner ho.
– Det er ein kraftfull spelar som er flink og har vore flink til å støtte opp under Erling Braut Haaland, både langs bakken, i spelet og den oppbyggande delen – men også det at han er eit oppspelpunkt, seier ho.
– Avgjerande
Som vanleg blir alt rundt Noregs største stjerne analysert ned til kvar minste detalj. Fleire reagerte på kor «køyrde» og «mør» storskåraren såg ut etter 1-2-tapet mot Wales torsdag.
– Eg trur fråværet av Alexander Sørloth var avgjerande for at vi ikkje tok fleire poeng i samlinga totalt, meiner fotballekspert Lars Tjærnås.
Éin siger og tre tap blei fasit på dei tre kampane.
– Å ha ein annleis type enn dei andre i fleire posisjonar gjer at du meistrar fleire kampbilde. Og særleg i går mot Portugal, der vi valde å spele meir langt og direkte, ville han (Sørloth) gitt oss langt fleire gevinstar i duellar høgt i banen – og med det moglegheiter til å løfte laget og vinne andreballar, grunngir Tjærnås.
Det meiner han ville styrkt Noreg på dødball begge vegar, og dessutan vore ein trussel på innlegg.
– Og ikkje minst kunne han gitt Haaland avlasting han verkeleg trengde.
– Så forstår eg at Ståle vil bruke han mest mogleg, men i ettertid er det liten tvil om at både han, Martin Ødegaard og Sander Berge ville hatt godt av avlasting undervegs i nokre kampar, seier Tjærnås.
Spent på belastninga
NRK spurde landslagssjefen om korleis Haaland har blitt påverka av mangelen på Sørloth, spesielt i duellspelet.
– Det trur eg kjem litt an på. I dag, så kanskje. Men om dette hadde vore kamp to, så hadde ikkje det vore noko problem. Og det såg du kanskje i kampane mot Danmark og Portugal, at det var null problem, svarar Solbakken, som ikkje trur smellen det såg ut som Haaland fekk var alvorleg.
– Det såg veldig ufarleg ut. Men eg trur det går litt på heilskapen, at han rett og slett var ordentleg køyrd.
Tjærnås meiner totalbelastninga på Haaland «nesten er umenneskeleg».
– Ikkje berre fordi han spelar mykje, men fordi han lever med presset å heile tida skulle vere avgjerande, og med å vere den eine spelaren motstandaren vil ta ut med alle middel.
– Nå er eg sjølvsagt spent på belastninga til Erling i Manchester City. Ikkje berre henne på banen, der han er einaste naturlege spiss, men også i ein ekstraordinær situasjon – som same kor sterk du er mentalt kjem til å slite.