– Ho fortalde at han hadde vore heime hos ho og skrive på bilen hennar og kjefta på ho, fortalde Tom Ketil Krogstad i retten.
Han er eigaren og drivaren av Bjørnlihiet pub og gjesteheim der Marita Løfshus Haugen arbeidde.
Kvelden 13. desember i fjor blei Haugen funne drepen like ved arbeidsstaden.
Kort tid etter blei Jørn Andersen pågripen av politiet i leilegheita si i gjesteheimen.
Ikkje lenge før ho blei drepen, skar relasjonen seg mellom Andersen og Haugen.
– Fram til da hadde ho berre vore positiv til Jørn, men frå den kvelden så fekk på ein måte tilliten til han ein knekk.
No er Andersen tiltalt for å ha tatt livet av Haugen.
Første dag i retten nekta Andersen straffskuld. Han fortalde at han ikkje hugsar noko frå kvelden Haugen blei funnen drepen.
Samstundes nekta han ikkje for at han kan ha tatt livet av ho.
– Eg opplever at han er nær til å bekrefte at det er han som er drapsmannen, sa aktor i saka, Per Morten Schjetne til NRK måndag.
Andersen sin advokat, Fredrik Schøne Brodwall har så langt ikkje ønska å kommentere saka.
Kom aldri på jobb
Haugen jobba på Bjørnlihiet pub på Løkken. I det same bygget budde Andersen i ei leilegheit.
Leilegheita delte han med eigaren Tom Ketil Krogstad.
Kvelden ho blei funnen død skulle Haugen på jobb klokka 20.00.
Ho kom aldri på jobb. Klokka 21.40 blei ho funnen drepen ved bilen sin ikkje langt frå puben.
Ifølge tiltalen døde ho etter å ha blitt stukken med ein machete i brystet og ryggen.
Da politiet kom til staden konstaterte dei fort at Haugen var død.
Kort tid seinare pågreip dei Andersen i leilegheita hans.
– Fram til da hadde ho berre vore positiv til Jørn
– Eg har aldri sett han vore valdeleg eller vore ubehageleg med dei damene han har kjent, fortalde Krogstad.
Han fortel at han var klar over at Andersen tidlegare var dømt for drap, men at han ikkje kjente mange detaljar.
Etter at relasjonen mellom Haugen og Andersen skar seg ønskte han likevel å snakke med dei to.
Onsdagen før ho blei drepen hadde Haugen, Andersen og Krogstad eit møte for å prate saman om situasjonen.
– Eg ville at vi skulle prate saman oss tre og ha eit møte saman for å roe situasjonen, for det hadde jo blitt ein del skittkasting og krangling.
– Jørn beklaga fleire gongar sin oppførsel, og Marita kom med klare tilbakemeldingar til Jørn om at ho hadde mista tillit til han og at ho ønskte å avslutte relasjonen på den måten han hadde vore.
På møtet blei dei einige om at Andersen ikkje skulle opphalde seg i puben når Haugen var på jobb og at han ikkje skulle kontakte ho.
– Møtet blei avslutta med at begge to heldt rundt kvarandre og gav kvarandre ein klem.
– Da sa han noko sånt som at «eg erkjenner alt»
Da Haugen ikkje kom på jobb tenkte ikkje Krogstad at noko alvorleg hadde skjedd.
Etter ein stund sende han ei melding til Haugen:
Seinare prata Krogstad med politiet på staden.
– Eg snakka med ein politimann, og eg seier at eg trur det må ha skjedd noko mellom Marita og Jørn, og eg trur at de finn vedkommande som har gjort den ugjerninga her i den leilegheita som eg har i huset.
Omtrent 23.20 blir Andersen pågripen.
– Da sa han noko sånt som at «eg erkjenner alt», fortalde aksjonsleiar i politiet frå vitneboksen i Trøndelag tingrett.
– Da vi spurde han om kva han meinte med det, så ville han ikkje seie noko meir.
Da politiet sette handjern på Andersen sa han først at dei var for stramme, fortalde aksjonsleiaren.
– Men så sa han noko sånt som at «men eg fortener det».
– Da vi spurde han om kva han meinte med det, ville han ikkje svare.
Politimannen fortalde at han oppfatta Andersen som litt rusa, men at det ikkje var noko problem å føre ein samtale med han.
Sår i andletet
– Han har to parallelle sår frå litt under auget og ned til munnvikene, fortalde kriminalteknikar Kathrine Nærum Storflor mens ho viste fram eit bilete av Andersen tatt like etter pågripinga.
Ho la fram analysen av tekniske bevis frå både Andersen, Haugen og åstaden.
Da det blei vist bilete forlét fleire av dei pårørande rettssalen.
Storflor fortel at det også blei gjort undersøkingar av mellom anna fingrane og under neglene til Haugen.
– Der gir prøvesvaret indikasjon på blod med DNA frå Marita Løfshus Haugen og tiltalte.
Det blei også gjort funn av Haugen sitt blod på innsida av bilen hennar.
Analysar av det kan tyde på at Haugen blei utsett for stump vald mens ho framleis sat i bilen, fortalde Mats Erik Lilleskjæret frå Kripos.
Han fortalde at det også blei funne blod på buksa og jakka til Andersen.
Analysar av blodet viste at det høgst truleg var Haugen sitt blod, fortalde Lilleskjæret.
– Eit uttrykk for at det er brukt mykje kraft
Overlege Harald Aarset la fram rapporten etter patologiske undersøkingar.
Undersøkingane viser at Haugen blei utsett for to store stikkskadar.
– Da ho fekk det andre stikket så var ho så godt som død.
Han fortalde at det eine stikket også har gått gjennom ribbeina.
– Så det er eit uttrykk for at det er brukt mykje kraft.
Aarset fortel at det ikkje blei funne mange skader som tyder på at Haugen kjempa imot.
– Ho har ikkje hatt sjansar til å gjere noko særleg motstand, kan det virke som.
Etterlet seg to barn
– Det er openbert at tida etter drapet av Marita har vore tøff for familien.
Det seier bistandsadvokat Laila Afelad, på vegner av den etterlatne familien.
– Ho etterlet seg to mindreårige barn, det er kjempetøft. Og ei mor og ein far som har hatt det utruleg vanskeleg.
– Det er vondt å miste ei mor som er djupt, djupt sakna. Og ein ser jo først i etterkant kva konsekvensar det vil ha for desse to barna, legg ho til.
Under den første dagen i retten, då Jørn Andersen forklarte seg, var mor til stades i retten.
– Eg beundrar mor sterkt som kjem hit i dag og klarer å sitte i det same rommet som den tiltalte. Og så er det ein far som har det utruleg vanskeleg og tøft, sa Afelad etter den første dagen i retten.
Ho vil legge ned erstatningskrav, krav om oppreisingserstatning og for tap av forsørgar.
Tidlegare dømt for drap
Andersen blei i 1999 dømt for å ha tatt livet av sin tidlegare kjæraste, 16 år gamle Linn Charlott Nesblom.
Andersen sjølv erkjente ikkje straffskuld, men blei dømt til 15 år i fengsel for overlagt drap.
Mens han sona dommen for drapet, utøvde han grov vald mot ei anna tidlegare kjæraste under prøvelauslatinga.
Derfor blei han i 2011 dømt til 4 år og seks månader forvaring for grov vald og trugslar mot ekskjærasten.
Ny forskning om forvaring – 10 prosent gjentar grov kriminalitet
Vil be om forvaring
To rettspsykiatrisk sakkunnige som i går la fram sin erklæring fortalde at dei meiner Andersen har ein dyssosial personlegdomsforstyrring.
– Oppsummert vurderast observanden å ha ein alvorleg og stabil valdsproblematikk, forklarte psykologspesialist Hanne Foss Berget.
Risikoen for ny vald er spesielt knytt til intime relasjonar, meinte dei sakkunnige.
– Han får, i aukande grad kan det sjå ut som, ikkje til å vere i ein relasjon, idet han blant anna utøvar vald, og meistrar ikkje å forhalde seg til avvisning.
Statsadvokat Per Morten Schjetne fortalde måndag at han vil legge ned påstand om at Andersen blir dømt til forvaring.
– Vi meiner at ein tidsbestemt straff ikkje er tilstrekkeleg for å verne samfunnet for nye tilsvarande hendingar, fortalde statsadvokaten måndag.