Onsdag ettermiddag sit to menn i avhøyr hos politiet, mistenkt for å stå bak valden.
Operasjonsleiar Sindre Molnes i Møre og Romsdal politidistrikt opplyser førebels ikkje kva dei to er sikta for.
Litt tidlegare i ettermiddag opplyste innsatsleiaren på staden at ein mann var pågripen.
– Vi har gått til pågriping av ein mann og driv no med avhøyr og etter kvart blir det tekniske undersøkingar, sa innsatsleiar i politiet, Andreas Moseng Jakobsen til NRK like etter klokka 15.
Molnes kan førebels ikkje svare på kva for relasjon som er mellom dei tre involverte, kva for alder dei to sikta er i og konkret kva dei er sikta for.
Det er fleire politifolk på staden onsdag ettermiddag.
Sendt til sjukehus
Den skadde mannen som er i 30-åra, blei frakta til sjukehus, først til Hjelset i Molde, deretter til St. Olavs i Trondheim.
Politiet har oppretta straffesak og har jobba med å kartlegge kva som har skjedd med mannen og få informasjon frå folk som kan ha sett noko.
– Vi har sett inn store ressursar i denne saka, seier operasjonsleiar Eivind Klokkersund i Møre og Romsdal politidistrikt.
Blei funnen på gata
Ein person kontakta politiet i formiddag etter å ha funne mannen på gata i Kristiansund sentrum.
– Han var bevisst da han blei funnen, men vi kan ikkje seie noko no om skadesituasjonen. Vi ventar på meir informasjon frå sjukehuset, seier Klokkersund.
Politiet veit ikkje når mannen skal ha vore utsett for valdshendinga, men trur har skjedd seint tysdag kveld eller natt til onsdag.
