– Viss regjeringa skal representere det norske folk, så må jo representantane også representere folket, seier Einar Halleraker som NRK møter i Stavanger.
– Regjeringa bør absolutt løfte blikket frå arket og sjå menneske. Men viss dei berre held seg i Oslo, så klarar dei ikkje det, held han fram.
Ein ny regjeringskabal med markant Oslo-overvekt skaper reaksjonar.
Med dagens endringar i regjeringssamansetninga går Jon-Ivar Nygård (Østfold), Andreas Bjelland-Eriksen (Rogaland), Karianne Oldernes Tung (Trøndelag) ut av regjeringa.
Inn kjem Eileen Fugelsnes (Oslo), Kamzy Gunaratnam (Oslo) og Torgeir Micaelsen (Buskerud).
Det betyr at det nå er seks regjeringsmedlemmar frå hovudstaden, som betyr at 30 prosent av regjeringa nå er henta frå Oslo.
Til samanlikning har Oslo 20 av 169 representantar på Stortinget, noko som utgjer 11,8 prosent.
– Handlar om prioriteringar
Fleire NRK møter på gata i Rogaland reagerer på den nye regjeringssamansetninga.
Tone Langvik seier ho blei oppgitt når ho såg endringane.
– Det handlar om prioriteringane deira. Viss det er så mange frå Austlandet, så blir Austlandet også prioritert, seier Langvik og peiker særleg på samferdselsprosjekt på Vestlandet.
Håkon Johnsstuen seier at regjeringa burde spegle landet geografisk.
– Avhengig av kor ein er i landet, så har ein gjerne eigne interesser for sin region, seier Johnsstuen.
Vincent Lien, meiner Rogaland står svakare med mindre representasjon.
– Eg er overtydd om at oljeindustrien og det grøne skiftet er tent med å ha Rogaland representert. Det same gjeld samferdsel, kraftpolitikk og eksempelvis utbygging av datasenter, held han fram.
Fryktar at Vestlandet blir gløymt
Fleire stader på Vestlandet reagerer ein no på endringane.
Møre og Romsdal får ingen representantar i den nye regjeringa. Det er skuffande for fylkesleiar Hanne-Berit Brekken (Ap).
Ho meiner det er ein tankevekkar at Karianne Tung, som er frå Trøndelag, går ut og ikkje blir erstatta av nokon nord for Oslo.
– Ein bør då ha ein brei representasjon frå hele landet, og det er ei frykt for at det blir for mange frå det sentrale Oslo-området, seier ho.
Samtidig understrekar Brekken at Møre og Romsdal er representert med tre statssekretærar, som ho meiner er veldig positivt.
– Vi har vore i periodar vi ikkje har hatt nokon, seier ho.
Dagleg leiar Mathias Fischer i Initiativ Vest uttrykker også stor bekymring over at Vestlandet mistar innflytelse når Andreas Bjelland Eriksen frå Rogaland går ut av regjeringa.
– Dei som kjem inn er frå Oslo, Oslo og Drammen. Det er meir Oslo-dominans i regjeringa nå. Dei mistar perspektiv frå heile landet, seier Fischer.
Han meiner det er samferdselspolitikken som vil lide mest under den nye samansetninga.
– Kamzy Gunaratnamhar har sagt at hennar viktigaste prioriteringar er kollektiv i byane og jernbane på Austlandet. Det blir spennande når ho legg fram den nasjonale transportplanen, seier han.
Skepsis til ny samferdselsminister
Frykta for samferdselssektoren blir delt av Harald Minge, administrerande direktør i Næringsforeininga i Stavanger.
Han er skuffa over at Oslo-politikar Kamzy Gunaratnam blir ny samferdselsminister.
Han peiker på at Gunaratnam tidlegare har omtalt den nye Rikstunnelen i Oslo, med ein stipulert kostnad på 66,7 milliardar kroner, som det viktigaste samferdselsprosjektet i landet.
– Ein statsråd er statsråd for heile landet, same kor vedkommande kjem frå. Men er det éin statsrådspost som vi veit blir farga av geografisk tilhøyrsel, så er det samferdselsministeren, seier Minge.
Den nyinnvigde samferdselsministeren seier derimot at ho vil jobbe for heile landet.
– Eg skal jobbe for heile Noreg og ta opp alle viktige saker som er viktige i det langstrekte landet vårt. Men samtidig er vi alle frå ein stad, eg er Oslo- og Hammerfest-jente. Det kjem til å prege mitt syn på verda. Men sjølv om hjartet er forankra her, er hjernen klar for å jobbe for heile Noreg.
