– Vi har betre råd enn for fem år sidan, ti år sidan og femten år sidan, seier sjeføkonom Harald Magnus Andreassen i Sparebank 1 Markets.
I 2024 og 2025 auka kjøpekrafta i norske hushaldningar, viser tal frå Statistisk sentralbyrå (SSB).
– Dermed kan dei fleste handle meir enn det dei har kunne handla før.
Andreassen understrekar at det framleis er personar som har dårleg råd i landet, men at dette er ikkje noko nytt.
– Det har blitt altfor mykje føleri, eg arbeider med tal, seier Andreassen.
– Lever livet i rekneark
Raudt-leiar Marie Sneve Martinussen reagerer på utsegnene til sjeføkonomen.
– Eg blir kvalm kvar gong eg høyrer høgtlønte bankøkonomar forklare folk at det å ha dårleg råd, berre er ei kjensle, seier ho.
Raudt-leiaren er ueinig i at folk sin økonomiske situasjon botnar i føleri. Ho trekker fram minstepensjonistar, der veksten i inntekt ikkje har vore stor.
– Dei aller rikaste i Noreg har blitt mykje rikare.
Frp-leiar Sylvi Listhaug hevdar at tusenvis har fått dårlegare råd.
– Det som er problemet med økonomar er at dei lever livet i rekneark med gjennomsnittstal. Men det er ikkje slik folk lever, seier Listhaug.
Til det svarar seniorøkonom Oddmund Berg i DNB Carnegie:
– I reknearka finn vi ut at veksten er positiv. Det er riktig nok ein moderat oppgang, men det er ei betring.
– Veldig mange i Noreg har lån, store lån, og for desse opplever veldig mange å ha fått trongare økonomi, seier Listhaug.
Ingen økonomisk krise
Andreassen understrekar at det ikkje er ei økonomisk krise i Noreg, når ein ser på tala frå SSB.
– For nokon er det ei krise, seier Trygve Slagsvold Vedum, leiar i Senterpartiet.
Han peiker på at fleire små og mellomstore verksemder har hatt store utfordringar som følge av den økonomiske situasjonen i landet.
– Mykje av det vi og SSB ser på er meir langsiktige trekk, seier samfunnsøkonom og porteføljeforvaltar Olav Chen i Storebrand.
Chen peikar på at det viktigaste politikarane kan gjere er å forsøke å få ned inflasjonen.
Sjå heile Debatten mellom økonomane og politikarane her:
Renteheving og straumstøtte
I det siste har debatten gått sin gang rundt:
- Noregs Bank som sette opp styringsrenta med 0,25 prosentpoeng.
- Rekordhøge drivstoffprisar og kutt i drivstoffavgiftene.
- Dyre handleturar i daglegvareforretningane.
- Straumstøtte og noregspris.
I tillegg har fleire av dei rikaste i landet tatt turen til Sveits, i frykt for høgare formuesskatt og andre skattar.
163 Sveits-utflyttarar: Formuesskatten som forsvann
Matmoms og drivstoffkutt
Trass tala frå SSB er Frp-leiar Sylvi Listhaug tydeleg på at drivstoff- og matprisane må ned.
– Det aller første vi må gjere er å gjere noko med drivstoffavgiftene – innføre på nytt det kuttet som var der, seier Listhaug i Dagsnytt 18.
Ho meiner at eit avgiftskutt i drivstoff vil kome vanlege folk og verksemder til gode.
– Vi meiner også at vi må gjere noko med matmomsen.
– Dette er viktige tiltak som vi bør gjere raskt.
– Vi meiner at andre tiltak verkar betre, har større effekt og hjelper betre dei som treng det aller mest. Det aller viktigaste vi meiner er å halde orden i norsk økonomi, seier finansminister Jens Stoltenberg (Ap).
Stoltenberg peikar på lågare inntektsskatt, billige barnehagar og straumstøtte-ordningar som meir treffsikre ordningar.
– Vi er opptatt av at folk skal få betre råd, heldigvis har folk fått betre råd. Prisane har vakse, men lønningane har vakse klart meir.