Varslar om ekstremt arbeidspress på nytt sjukehus

Dronefoto av et moderne sykehus ved kysten omgitt av skog, plen og veier i et kupert landskap. (Bildebeskrivelsen er laget av en KI-tjeneste) — Sjukepleiarforbundet har sendt inn bekymringsmelding om sjukehuset Nordmøre og Romsdal (SNR) på Hjelset. Foto: Eirik Haukenes / NRK

Det flunkande nye sjukehuset for Nordmøre og Romsdal vart opna med korps, kronprins og kake i fjor.

Men sidan då har ti leiarar forlate stillingane sine.

No har Norsk sjukepleiarforbund meldt helseføretaket inn til Arbeidstilsynet. Det er fordi leiarane dei har vore i kontakt med ikkje torer sjølv.

– Dei fortel om eit ekstremt høgt arbeidspress, manglande ressursar og manglande forståing for situasjonen dei står i, seier fylkesleiar Trine Sevaldsen.

Ho ber Arbeidstilsynet undersøke arbeidsforholda ved SNR.

Leder i Sykepleierforbundet Møre og Romsdal (NSF). — Fylkesleiar i sjukepleiarforbundet, Trine Sevaldsen, ber Arbeidstilsynet om å undersøke arbeidsforholda. Foto: Marius André Jenssen Stenberg / NRK

Enormt arbeidspress

NRK har kontakta alle dei ti leiarane, som no er ute av stillingane sine. Fem av dei vil snakke anonymt.

Fleire av dei anonyme leiarane er redde for kva det vil gjere med framtidige jobbmoglegheiter dersom dei står fram.

NRK har tidlegare skrive om høgt sjukefråvær og høgt belegg ved SNR.

Sykehuskorridor ved dagkirurgi med skilt og en helsearbeider i hvit uniform som går gjennom døren. (Bildebeskrivelsen er laget av en KI-tjeneste) — Sjukefråveret på det nye sjukehuset har vore over 13 prosent. Foto: Roar Jonny Strøm / NRK

Ikkje tid til å trekke pusten

Det nye sjukehuset for Nordmøre og Romsdal vart tatt i bruk for halvanna år sidan, og erstatta sjukehusa i Molde og Kristiansund.

Flytteprosessen skal ha vore svært krevjande for dei tilsette.

I tillegg kom innføringa av journalsystemet Helseplattforma der leiarane fekk ekstra arbeid i tillegg til sine vanlege arbeidsoppgåver.

Oppå der kom Helse Møre og Romsdal sine sparekrav og omstillingar. Helseføretaket skal spare ein milliard dei neste åra.

Ambulansearbeidere i en gang på Molde sjukehus. — Pasientane vart flytta frå sjukehusa i Molde og Kristiansund i april 2025. Foto: Roar Jonny Strøm / NRK

– Fryktkultur

Ifylgje Sjukepleiarforbundet fortel fleire av leiarane at dei har prøvd å seie frå om denne uhaldbare situasjonen oppover i systemet, men opplever at dei ikkje vert tatt på alvor og at det heller ikkje er takhøgd for å seie frå.

Kjenner seg ikkje att i påstandane

Klinikksjef ved SNR, Britt Rakvåg Roald, vil ikkje stille til intervju, men skriv i ein e-post at etableringa av det nye sjukehuset, innføringa av Helseplattforma og store økonomiske utfordringar har vore krevjande både for tilsette og leiarar.

– Eg har respekt for at nokre leiarar vel å gå vidare til andre stillingar eller utfordringar. Samtidig er det ikkje mogleg for oss å kommentere anonymiserte personalsaker i media, skriv ho.

Ho understrekar at dei ikkje kjenner seg att i påstandane om manglande forståing, at innspel ikkje blir tatt på alvor eller frykt for represaliar.

Ho meiner at sjukehuset legg stor vekt på open dialog og medverknad i alle prosessar.

Britt Rakvåg Roald, konstituert ny klinikksjef, SNR — Britt Rakvåg Roald er klinikksjef ved SNR. Ho meiner sjukehuset legg stor vekst på open dialog. Foto: Roar Strøm / NRK

Fryktar for pasienttryggleiken

Trine Sevaldsen i Norsk Sjukepleiarforbund meiner at det ho har fått høyre frå dei tidlegare leiarane er alvorleg.

Dei fryktar at det store arbeidspresset går utover pasienttryggleiken.

– Om det har gjort det får eventuelle avvik vise. Men frykta er der, seier Sevaldsen.

Denne artikkelen vart publisert 15. oktober klokka 06:56. Klokka 16:41 sendte kommunikasjonsrådgjevar i Helse Møre og Romsdal Guri Viken eit skriftleg innspel frå administrerande direktør Olav Lødemel. Du kan lese heile svaret her:

Vi kjenner oss ikkje att i det biletet som blir teikna av situasjonen ved SNR

Det siste døgnet har det kome fram påstandar i media som gir eit bilete av leiing, arbeidsmiljø og handtering av utfordringar ved klinikk SNR på Hjelset som eg meiner det er viktig å kommentere.

Vi kjenner oss ikkje att i framstillinga av at bekymringar ikkje blir tekne på alvor, eller at det manglar openheit og dialog i organisasjonen. Medverknad og involvering er grunnleggjande verdiar i Helse Møre og Romsdal. Vi legg stor vekt på dialog med medarbeidarar, tillitsvalde og vernetenesta, og vi har etablerte system for å melde frå om forhold som ein meiner bør følgjast opp. Vi ønskjer òg dialog med lokal leiing, tillitsvalde og verneombod om dei påståtte forholda som no kjem fram i media, slik at vi kan få belyst saka på ein grundig og ryddig måte.

Det er inga tvil om at etableringa av det nye sjukehuset på Hjelset har vore ei svært krevjande oppgåve. Flyttinga til eit heilt nytt sjukehus, innføringa av Helseplattforma og den økonomiske situasjonen helseføretaket står i, har stilt store krav til både medarbeidarar og leiarar. I ein slik situasjon vil det oppstå utfordringar som må handterast undervegs. Det viktige er korleis vi møter desse utfordringane.

Eg har stor respekt for den innsatsen som er lagd ned gjennom denne perioden, og full tillit til klinikksjef Britt Rakvåg Roald og dei andre leiarane i klinikken. Dei har over tid handtert krevjande problemstillingar, samtidig som dei har sørga for forsvarleg pasientbehandling og stabil drift gjennom ei omfattande omstilling. Sjølv om det har vore utfordringar, har medarbeidarar og leiarar kvar dag bidrege til at pasientane har fått den behandlinga dei treng.

Når det gjeld opplysningane om at saka skal vere meldt til Arbeidstilsynet, har Helse Møre og Romsdal per i dag ikkje motteke informasjon om dette utover det som er omtalt i media. Dersom Arbeidstilsynet vel å følgje opp saka, vil vi sjølvsagt samarbeide fullt ut og bidra til ei open og ryddig handtering.

Det er viktig at alle stemmer blir høyrde, og at bekymringar blir tekne på alvor. Samtidig meiner eg at det biletet som no blir teikna, ikkje gir ei balansert framstilling av situasjonen ved SNR eller av den store innsatsen medarbeidarar og leiarar har lagt ned for å halde oppe eit godt tilbod til pasientane gjennom ei svært krevjande omstillingsperiode. Eg vil rette ei stor anerkjenning til alle som har bidrege i dette arbeidet, og eg har stor tillit til leiarane og medarbeidarane som kvar dag arbeider for å sikre pasientane gode og forsvarlege helsetenester.