– Den førebels etterforskinga har avdekka at den overbygde, 7–8 meter lange fritidsbåten som forliste i båtulukka blei påkøyrd, nærmast overkøyrd av det norske skipet «Misje Verde», skriv den svenske påtalemakta i ei pressemelding.
Båten vart trekt inn under skipet og sokk til botn på 20 meters djupn. Føraren av fritidsbåten er førebels ikkje mistenkt for å ha brote maritime reglar, skriv dei vidare i pressemeldinga.
Forsvarar Taavi Tuula opplyser til NRK at hans klient nektar straffskuld, utover det har forsvararen ingen ytterlegare kommentar.
– Eg er ikkje overraska over at han blir varetektsfengsla med tanke på bevisa som krevjast for fengsling i denne situasjonen, seier Tuula til SVT.
– For å få ein fellande dom har påtalemakta ein lang veg igjen å gå.
Administrerande direktør Roald Misje i Misje Rederi er ikkje informert om handlingsforløpet i det han skildrar som ei «forferdeleg ulukke».
– Vi har ikkje fått noko informasjon frå svenske myndigheiter. Det er vanskeleg å kommentere når vi ikkje veit kva som har skjedd.
– Nektar straffskuld
Søndag blei det gjennomført eit fengslingsmøte med kapteinen. Retten kom fram til at kapteinen skal sitte i varetekt.
Tingretten i Sverige vurderer at det er ein risiko for at han vil stikke av og unndra seg tiltale eller straff, skriv SVT.
– Han nektar straffskuld og ansvar, skriv forsvarar Taavi Tuula i ei tekstmelding til NRK.
Pågripen kaptein
Svenske myndigheiter undersøker hendinga og tok beslag i det norske skipet «Misje Verde».
Fredag fekk skipet forlate Sverige og sette kursen mot Noreg, utan kapteinen som måtte bli verande i Sverige.
– Det er ikkje så mykje vi er sikre på, men det som har komme fram tyder på ein kollisjon mellom lastebåten og fritidsbåten med alvorlege konsekvensar, sa Johan Albin i den svenske havarikommisjonen til SVT fredag.
Kapteinen blei pågripen av svensk politi tidlegare i veka, mistenkt for aktløyse på sjøen og for å ha forårsaka ein annans død.
«Misje Verde» var på veg frå Uddevalla til Kragerø med eit mannskap på åtte om bord.
Ein familie på fire var om bord i ein fritidsbåt då ulukka skjedde.
Far og son blei henta opp av vatnet med alvorlege skadar, medan mora og dottera blei funnen omkomne to døgn seinare.
Tilstanden til far og son skal vere stabil.
Held deg oppdatert på det som skjer i Sverige her:
Mogleg lydopptak
Mannskapet, som skal vere russisk og ukrainsk, har blitt avhøyrde av den svenske havarikommisjonen.
Havarikommisjonen har håp om at det finst lydopptak av kva som skjedde på brua under ulukka, ettersom dei har sikra seg skipet sin «svarte boks».
Representantar frå reiarlaget har også vore i kontakt med havarikommisjonen, som opplyser at det skal vere godt samarbeid mellom dei.
Interessert i det som skjer i verda? Høyr podkasten til Urix: